ഭാര്യ സ്വയം തീകൊളുത്തുന്നത് ഭർത്താവ് മൊബൈലിൽ പകർത്തി; രണ്ട് കേസുകളിൽ പ്രതിയാക്കി പോലീസ്

ജയ്പൂര്‍: യുവതിയുടെ ആത്മഹത്യയ്ക്ക് പിന്നാലെ ഭര്‍ത്താവിനെയും നാല് കുടുംബാംഗങ്ങളെയും അറസ്റ്റ് ചെയ്ത് പോലീസ്. ഭാര്യ സ്വയം തീകൊളുത്തി ജീവനൊടുക്കുന്നതിൻ്റെ വീഡിയോ ഭര്‍ത്താവ് മൊബൈൽ ക്യാമറയിൽ പകര്‍ത്തിയെന്നും ഇത് ഭാര്യയുടെ മാതാപിതാക്കള്‍ക്ക് അയച്ചു കൊടുത്തെന്നുമാണ് റിപ്പോര്‍ട്ടുകള്‍. ഒരാഴ്ചയ്ക്ക് മുൻപു നടന്ന സംഭവത്തിലാണ് ഇപ്പോള്‍ അറസ്റ്റ് നടന്നിരിക്കുന്നത്.

നവംബര്‍ 20നാണ് രാജസ്ഥാനിലെ ഗുധാഗോര്‍ജി സ്വദേശിയായ യുവതി ഭര്‍തൃവീട്ടിൽ തീകൊളുത്തിയത്. ഗുരുതരമായ പൊള്ളലുകളോടെ പ്രദേശത്തെ ആശുപത്രികളിൽ പ്രവേശിപ്പിച്ച യുവതി രണ്ട് ദിവസത്തിനു ശേഷം മരണത്തിന് കീഴടങ്ങുകയായിരുന്നു. സംഭവത്തിൽ ഭര്‍ത്താവിനെയും സഹോദരനെയും ഇവരുടെ മാതാപിതാക്കളെയും ഭര്‍ത്താവിൻ്റെ പിതൃസഹോദരനെയും ഒരു അമ്മാവനെുയും അമ്മായിയെയുമാണ് അറസ്റ്റ് ചെയ്തതെന്നാണ് സ്ഥലത്തെ പോലീസീ സ്റ്റേഷനിലെ സ്റ്റേഷൻ ഹൗസ് ഓഫീസര്‍ ദെഹ്റി സിങ് വാര്‍ത്താ ഏജൻസിയായ പിടിഐയോടു പറഞ്ഞത്.

Also Read: ബാർ കോഴ: ചെന്നിത്തലക്കെതിരായ അന്വേഷണത്തിന് ഗവർണറുടെ അനുമതി വേണ്ടെന്ന് നിയമോപദേശം

യുവതിയുടെ മരണവുമായി ബന്ധപ്പെട്ട് ഐപിസി 498എ, 306 എന്നിവ പ്രകാരമാണ് ഭര്‍ത്താവിൻ്റെ ബന്ധുക്കള്‍ക്കെതിരെ കേസെടുത്തിരിക്കുന്നത്. സ്ത്രീധനനിരോധന നിയമത്തിനു പുറമെ ആത്മഹത്യാപ്രേരണാ കുറ്റവും ഇവര്‍ക്കെതിരെ ചുമത്തിയിട്ടുണ്ട്. പോസ്റ്റ്മോര്‍ട്ടത്തിനു ശേഷം യുവതിയുടെ മൃതദേഹം കുടുംബാംഗങ്ങള്‍ക്ക് വിട്ടുകൊടുത്തു. കേസിൽ വിശദമായ അന്വേഷണം ആരംഭിച്ചതായും പോലീസ് അറിയിച്ചു.

Also Read: അസഭ്യവർഷവും മാനസികപീഡനവും; മാന്നാർ പോലീസിനെതിരെ യുവാവ് രംഗത്ത്; വൈറലായി ഫേസ്ബുക്ക് പോസ്റ്റ്

മുൻപ് ബെംഗളൂരുവിലെ രാമമൂര്‍ത്തി നഗറിലും ഒരു മാസം മുൻപ് സമാനമായ സംഭവം നടന്നിരുന്നു. 22കാരിയായ യുവതിയെ ഭര്‍ത്താവ് തീകൊളുത്തിക്കൊന്നു എന്നായിരുന്നു കേസ്. ഇയാള്‍ ഭാര്യയിൽ നിന്ന് കൂടുതൽ സ്ത്രീധനം ആവശ്യപ്പെട്ടിരുന്നുവെന്നും ആവശ്യം നിരാകരിച്ചപ്പോഴായിരുന്നു കൊല നടത്തിയതെന്നുമാണ് കേസുമായി ബന്ധമുള്ള പോലീസ് ഉദ്യോഗസ്ഥരെ ഉദ്ധരിച്ചുള്ള ദേശീയമാധ്യമങ്ങളുടെ റിപ്പോര്‍ട്ട്. ഈ വര്‍ഷം തന്നെ ഓഗസ്റ്റിൽ തമിഴ്നാട്ടിലെ വില്ലുപുരത്ത് കൂടുതൽ സ്ത്രീധനം ആവശ്യപ്പെട്ട ഭര്‍ത്താവ് തീകൊളുത്തി യുവതി മരിച്ച സംഭവവും റിപ്പോര്‍ട്ട് ചെയ്തിരുന്നു. 21കാരിയായ യുവതിയിൽ അമ്മായിയച്ഛനും അമ്മായിയമ്മയും ചേര്‍ന്ന് കട്ടിലിൽ കെട്ടിയിട്ട് മണ്ണെണ്ണയൊഴിച്ച് തീകൊളുത്തിയ സംഭവം ഒഡീഷയിൽ നിന്ന് റിപ്പോര്‍ട്ട് ചെയ്തതും ഈ വര്‍ഷമായിരുന്നു.