അന്യജാതിക്കാരനെ വിവാഹം ചെയ്തു: ഗർഭിണിയെ വെടിവെച്ച് കൊന്നു

ഇൻഡോർ: മധ്യപ്രദേശിലെ ഇൻഡോറിൽ അന്യജാതിക്കാരനെ വിവാഹം ചെയ്ത ഗർഭിണിയായ യുവതിയെ സഹോദരങ്ങൾ വെടിവെച്ച് കൊന്നു. ബേഠ്‍മ സ്വദേശിനി ബുള്‍ബുള്‍ (21) നെയാണ് സഹോദരനാണ് വെടിവെച്ച് കൊന്നത്. ബുൾബുള്ളിന്റെ സഹോദരങ്ങളായ കാര്‍ത്തിക്, ശുഭം എന്നിവരെ പോലീസ് അറസ്റ്റ് ചെയ്തു.

ബുൾബുള്ളും കുൽദീപ് രജാവത്ത് എന്ന യുവാവുമായി ഏറെ നാളുകളായി പ്രണയത്തിലായിരുന്നു. എന്നാൽ ഇവരുടെ വിവാഹത്തിന് വീട്ടുകാർ സമ്മതം നൽകിയില്ല. വീട്ടുകാർ ഇവരുടെ ബന്ധത്തെ എതിർത്തതോടെ ബുൾബുള്ളും രജാവത്തും എട്ട് മാസങ്ങൾക്ക് മുൻപ് ഒളിച്ചോടി പോയി വിവാഹം ചെയ്തു.

വിവാഹത്തിന് ശേഷം ആദ്യമായി സ്വന്തം വീട്ടിലേക്ക് കഴിഞ്ഞ ദിവസം ബുൾബുൾ എത്തിയിരുന്നു. വീട്ടിൽ നിന്ന് മാതാപിതാക്കളെ കണ്ട് മടങ്ങുന്ന സമയത്താണ് സഹോദരന്മാർ വെടിയുതിർത്തത്. തലക്ക് വെടിയേറ്റ ബുൾബുള്ളിനെ ഉടനെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല.