ജ്യേഷ്ഠന് രണ്ടാമതും വിവാഹം; അവിവാഹിതനായ യുവാവ് നവവധുവിനെ കൊലപ്പെടുത്തി

പറ്റ്ന: താൻ അവിവാഹിതാനിയിരിക്കെ ജ്യേഷ്ഠൻ രണ്ടാമതും വിവാഹം കഴിച്ച ദേഷ്യത്തിൽ യുവാവ് നവവധുവിനെ കൊലപ്പെടുത്തി. ബിഹാറിലെ സിരിപുർ സബ്നാഹിപട്ടി ഗ്രാമത്തിൽ ഇക്കഴിഞ്ഞ ശനിയാഴ്ചയാണ് സംഭവം. കേസുമായി ബന്ധപ്പെട്ട് മനോജ് പണ്ഡിറ്റ് എന്ന മുപ്പതുകാരനെ പിടികൂടിയതായി പോലീസ് അറിയിച്ചു.

കൊലപാതകത്തിന് പിന്നാലെ സ്ഥലത്ത് നിന്ന് കടന്ന കളഞ്ഞ മനോജിനെ പിറ്റേദിവസമാണ് പിടികൂടിയതെന്ന് സിരിപുർ ഔട്ട്പോസ്റ്റ് ഇൻ ചാർജ് സഞ്ജീത് കുമാർ വ്യക്തമാക്കി. ഇയാളുടെ സഹോദരൻ ഗണേശ് പണ്ഡിറ്റിന്‍റെ ഭാര്യ മീന ദേവി (34) ആണ് കൊല്ലപ്പെട്ടത്. തന്‍റെ വിവാഹം നടത്താതെ ജ്യേഷ്ഠന്‍റെ രണ്ടാം വിവാഹം കുടുംബം നടത്തിയതാണ് മനോജിനെ കൊലപാതകത്തിന് പ്രേരിപ്പിച്ചതെന്നാണ് ടൈംസ് ഓഫ് ഇന്ത്യ റിപ്പോർട്ട് വ്യക്തമാക്കുന്നത്.

Also Read : ഒരുമകളെ പീഡിപ്പിച്ച് കൊന്നു; മറ്റ് രണ്ട് പേർക്കും തനിക്കുമെതിരെ പീഡനം; 50കാരനെ ഭാര്യയും പെൺമക്കളും ചേർന്ന് കൊലപ്പെടുത്തി

നാൽപ്പത്തഞ്ചുകാരനായ ഗണേശിന്‍റെ ആദ്യ ഭാര്യ മരിച്ചതാണെന്ന് പോലീസ് പറഞ്ഞു. 'കുറേ വർഷങ്ങൾക്ക് മുന്നേ ഗണേശിന്‍റെ ആദ്യ ഭാര്യ മരിച്ചിരുന്നു. ഈ ബന്ധത്തിൽ ഇയാൾക്ക് രണ്ട് പെൺകുട്ടികളും ഒരു മകനുമുണ്ട്. രണ്ട് പെൺമക്കളുടെയും വിവാഹം കഴിഞ്ഞിരുന്നു. അമ്മയ്ക്ക് പ്രായമായതോടെ വീട്ടുജോലികൾ ചെയ്യാൻ ബുദ്ധിമുട്ടായതോടെയാണ് ഇയാൾ വീണ്ടും വിവാഹം കഴിച്ചത്. മൂന്ന് മാസം മുൻപായിരുന്നു മീനയുമായുള്ള വിവാഹം' പോലീസ് ഉദ്യോഗസ്ഥൻ പറഞ്ഞു.

എന്നാൽ താൻ അവിവാഹിതാനയി നിൽക്കേ ജ്യേഷ്ഠൻ വീണ്ടും വിവാഹിതാനയത് മനോജിനെ പ്രകോപിപ്പിക്കുകയായിരുന്നു. ജ്യേഷ്ഠനോടും അമ്മയോടും മീനയുമായും ഇയാൾ പതിവായി തർക്കത്തിലേർപ്പെടാറുണ്ടായിരുന്നു. ഇതാണ് കൊലപാതകത്തിൽ അവസാനിച്ചതെന്നാണ് പോലീസ് പറയുന്നത്. ശനിയാഴ്ച പുലർച്ചെ 2നും മൂന്നിനും ഇടയിലാണ് സംഭവം നടന്നത്.

Also Read : വാടകയെ ചൊല്ലി തർക്കം, വീട്ടുടമയായ സ്ത്രീ യുവതിയെ കുത്തി; സംഭവം ബെംഗളൂരുവിൽ

ശബ്ദം കേട്ട് മറ്റുള്ളവർ എഴുന്നേറ്റപ്പോൾ മീനയെ കൊല്ലപ്പെട്ട നിലയിൽ കണ്ടെത്തുകയായിരുന്നു. മനോജിന്‍റെ സ്വഭാവം മോശമായിരുന്നുവെന്നും അതുകൊണ്ടാണ് കുടുംബം പലതവണ ശ്രമിച്ചിട്ടും ഇയാളുടെ വിവാഹം നടത്താൻ സാധിക്കാതെ വന്നതെന്നുമാണ് പോലീസ് പറയുന്നത്.