മദ്യപിക്കാൻ പണം നൽകിയില്ല; മാതാവിനെ യുവാവ് അടിച്ചു കൊന്നു

മീററ്റ്: മദ്യപിക്കാൻ പണം നൽകാഞ്ഞതിനെത്തുടർന്ന് മാതാവിനെ യുവാവ് അടിച്ചു കൊന്നു. മർദ്ദനത്തിൽ സഹോദരിക്ക് പരിക്കേറ്റു. മീററ്റിലെ ബാലി ഗ്രാമത്തിൽ ചൊവ്വാഴ്ച രാത്രിയാണ് സംഭവം. റീത എന്ന സ്ത്രീയാണ് കൊല്ലപ്പെട്ടത്. സംഭവത്തിനു ശേഷം പ്രതി ഒളിവിൽ പോയതായി പോലീസ് വ്യക്തമാക്കി.

Also Read: കേരളത്തില്‍ ഇന്ന് 7789 പേര്‍ക്ക് കൊവിഡ്; 6486 പേര്‍ക്ക് സമ്പര്‍ക്കത്തിലൂടെ രോഗബാധ

മർദ്ദനത്തിൽ ഗുരുതരമായി പരിക്കേറ്റ യുവാവിന്റെ സഹോദരി ആശുപത്രിയിൽ ചികിത്സയിലാണ്. വിനീത് എന്നയാളാണ് പ്രതി. മോഷണ കേസിൽ അടുത്തയിടെയാണ് പ്രതി ജയിൽ മോചിതനായതെന്ന് ദൈനിക് ജാഗ്രൺ റിപ്പോർട്ട് ചെയ്തു. സഹോദരിയുടെ മൊഴിയുടെ അടിസ്ഥാനത്തിൽ വിനീതിനെതിരെ കേസ് രജിസ്റ്റർ ചെയ്തു.

ഭർത്താവിന്റെ മരണ ശേഷം പ്രതി അടങ്ങുന്ന മൂന്ന് മക്കളെ വളരെ കഷ്ടപ്പെട്ടാണ് കൊല്ലപ്പെട്ട റീത വളർത്തിയത്. മോശം കൂട്ടുകെട്ടിൽ അകപ്പെട്ട വിനീത് തുടർച്ചയായി മദ്യപിക്കുകയും വീട്ടുകാരെ ഉപദ്രവിക്കുകയും ചെയ്തിരുന്നു.

ചൊവ്വാഴ്ച രാത്രിയിൽ വീട്ടിലെത്തിയ പ്രതി മദ്യം വാങ്ങുന്നതിനായി മാതാവിൽ നിന്നും പണം ആവശ്യപ്പെട്ടു. പണം നൽകാൻ വിസമ്മതിക്കുകയും വിനീതിനെ ചോദ്യം ചെയ്യുകയും ചെയ്തതോടെ ഇരുവരും തമ്മിൽ വഴക്കായി. തുടർന്ന് ചാണകം നീക്കം ചെയ്യാൻ ഉപയോഗിക്കുന്ന ഇരുമ്പ് ദണ്ഡ് ഉപയോഗിച്ച് പ്രതി മാതാവിന്റെ തലയ്ക്കടിക്കുകയായിരുന്നു.

Also Read: ലാവ്ലിൻ കേസ്: സിബിഐ നടപടി ദുരൂഹമെന്ന് മുല്ലപ്പള്ളി രാമചന്ദ്രൻ

കരച്ചിൽ കേട്ട് നാട്ടുകാർ ഓടിയെത്തിയെങ്കിലും പ്രതി സ്ഥലത്തു നിന്നും രക്ഷപെട്ടു. തുടർന്ന് മാതാവിനേയും യുവതിയേയും ആശുപത്രിയിൽ എത്തിച്ചെങ്കിലും റീതയുടെ ജീവൻ രക്ഷിക്കാനായില്ല. സഹോദരി അഞ്ജലിയുടെ ചികിത്സ തുടരുകയാണ്.