സഹപ്രവർത്തകർ ഉൾപ്പെട്ട വാട്സ്ആപ്പ് ​ഗ്രൂപ്പിൽ ന​ഗ്നചിത്രങ്ങൾ അയച്ച് റിട്ട. ഐഎഎസ് ഉദ്യോ​​ഗസ്ഥൻ

ഗാന്ധിനഗർ: സഹപ്രവർത്തകർ ഉള്‍പ്പെട്ട വാട്സ്ആപ്പ് ഗ്രൂപ്പിൽ നഗ്നചിത്രങ്ങൾ അയച്ച് വിവാദത്തിലായിരിക്കുകയാണ് ഗുജറാത്തിലെ ഒരു റിട്ടയേർഡ് ഐഎഎസ് ഉദ്യോഗസ്ഥൻ. ജൂനിയറും സീനിയറുമായിട്ടുള്ള ഉദ്യോഗസ്ഥർ ഉൾപ്പെട്ട വാട്സ്ആപ്പിൽ വ്യാഴാഴ്ച രാത്രിയാണ് ഇയാൾ നഗ്നചിത്രങ്ങൾ അയച്ചത്. സർവീസിൽനിന്ന് വിരമിച്ച ഇയാൾ സർക്കാർ ജോലിയിൽ തുടരുകയാണ്.

സ്ത്രീകളടക്കമുള്ള ഗ്രൂപ്പിൽ അശ്ലീലച്ചിത്രങ്ങൾ അയച്ചതിനെ തുടർന്ന് രൂക്ഷവിമർശനമാണ് ഉദ്യോഗസ്ഥനെതിരെ ഉയർന്നത്. വെള്ളിയാഴ്ച രാത്രിവരെ ഗ്രൂപ്പിലുള്ളവർ ചിത്രങ്ങളെക്കുറിച്ചും മറ്റും വിമർശിച്ചെങ്കിലും ഉദ്യോഗസ്ഥൻ ഇതിനോടൊന്നും പ്രതികരിച്ചിരുന്നില്ല. വാട്സ്ആപ്പ് ഗ്രൂപ്പിൽ അയച്ച ചിത്രങ്ങളെക്കുറിച്ച് അദ്ദേഹത്തിന് അറിയില്ലെന്ന് ചില ഗ്രൂപ്പ് അംഗങ്ങൾ പറഞ്ഞു. തുടർന്ന് വിവരം ഗ്രൂപ്പിലെ മറ്റ് മുതിർന്ന ഉദ്യോഗസ്ഥർ ഇയാളെ വിളിച്ചറിയിച്ചു. ഇതിന് പിന്നാലെ ഉദ്യോഗസ്ഥൻ പോസ്റ്റ് ഡിലീറ്റ് ചെയ്യുകയായിരുന്നു.

Also Read: മാനസിക വെല്ലുവിളി നേരിടുന്ന മകളെ ഒരുവർഷത്തോളം പീഡിപ്പിച്ചു; വിവരം പുറത്തറിയുന്നത് യുവതി പ്രസവിച്ചപ്പോൾ

പൊതുവിവരങ്ങൾ മാത്രം പങ്കുവയ്ക്കുന്ന ഗ്രൂപ്പിലാണ് ഉദ്യോഗസ്ഥൻ സ്വകാര്യ ചിത്രങ്ങൾ അയച്ചത്. രാത്രിയോടെ ഉദ്യോഗസ്ഥൻ അയച്ച ചിത്രം കണ്ട് ഗ്രൂപ്പിലെ മറ്റുള്ളവർ ഞെട്ടുകയായിരുന്നുവെന്ന് മുതിർന്ന ഐഎഎസ് ഉദ്യോഗസ്ഥ പറഞ്ഞു. സംഭവം വെള്ളിയാഴ്ച ഗുജറാത്ത് മുഖ്യമന്ത്രിയുടെ ശ്രദ്ധയിൽപ്പെടുത്തിയിരുന്നു. എന്നാൽ, ഉദ്യോഗസ്ഥനെതിരെ മുഖ്യമന്ത്രിയുടെ ഓഫീസ് ഇതുവരെ ഒരു നടപടിയും സ്വീകരിച്ചില്ലെന്നും അവർ വ്യക്തമാക്കി.