പെൺകുട്ടിയെ പതിനാറ് മാസം പീഡിപ്പിച്ചു: ആറ് പേർ അറസ്റ്റിൽ

ഇൻഡോർ: പ്രായപൂർത്തിയാകാത്ത പെൺകുട്ടിയെ ആറ് പേർ ചേർന്ന് മാസങ്ങളോളം പീഡിപ്പിച്ചതായി പരാതി. മധ്യപ്രദേശിലെ ഇൻഡോറിലാണ് സംഭവം നടന്നത്. പെൺകുട്ടി നൽകിയ പരാതിയെ തുടർന്ന് ആറ് പേരെയും പോലീസ് അറസ്റ്റ് ചെയ്തു.

പ്രായപൂർത്തിയാകാത്ത പെൺകുട്ടിയെ ഒരു കാറ്ററിങ് കോൺട്രാക്ടർ അയാളുടെ മകൻ മറ്റ് നാല് പേർ എന്നിവർ ചേർന്ന് പതിനാറ് മാസങ്ങളോളം പീഡിപ്പിച്ചെന്നാണ് കേസ്. പെൺകുട്ടിയുടെ അമ്മ കഴിഞ്ഞ വർഷം മരിച്ചു പോയതിന് ശേഷം അച്ഛനൊപ്പമാണ് പെൺകുട്ടിയും അനിയത്തിയും കഴിഞ്ഞിരുന്നത്. പെൺകുട്ടിയുടെ അച്ഛൻ സ്വകാര്യസ്ഥാപനത്തിൽ വാച്ച്മാനായി ജോലി ചെയ്തു വരികയായിരുന്നു.

അച്ഛൻ ജോലിക്ക് പോയ ശേഷം തന്റെ വീട്ടിൽ വന്ന് കുട്ടികളെ നോക്കിയാൽ പണം നൽകാമെന്ന് കോൺട്രാക്ടർ പെൺകുട്ടിയോട് പറഞ്ഞു. തുടർന്ന്, പെൺകുട്ടി ജോലിക്കെത്തിയതോടെ കോൺട്രാക്ടർ മൊബൈൽ ഫോണിൽ അശ്ലീല വീഡിയോകൾ കാണിച്ച് പലതവണ പീഡിപ്പിച്ചു.

അമ്മയുടെ മരണശേഷം പെൺകുട്ടി പഠനം ഉപേക്ഷിച്ചിരുന്നു. കോൺട്രാക്ടറുടെ മകനും പെൺകുട്ടിയെ ഭീഷണിപ്പെടുത്തി ലൈംഗികമായി പീഡിപ്പിച്ചു. കോൺട്രാക്ടറുടെ ബന്ധുവിന്റെ ഫോൺ കൈക്കലാക്കിയാണ് പെൺകുട്ടി സുഹൃത്തിനോട് തന്നെ രക്ഷിക്കണമെന്ന് ആവശ്യപ്പെട്ടത്. എന്നാൽ, വിവരമറിഞ്ഞ സുഹൃത്തും അയാളുടെ സഹോദരനും പെൺകുട്ടിയെ ഭീഷണിപ്പെടുത്തി പീഡിപ്പിച്ചു.

അയൽവാസികളായ മറ്റ് രണ്ടു പേരും പെൺകുട്ടിയെ പീഡിപ്പിച്ചു. തുടർന്ന്, പിതാവിനോട് പെൺകുട്ടി സംഭവങ്ങൾ തുറന്നു പറഞ്ഞതോടെയാണ് സംഭവം പുറം ലോകം അറിഞ്ഞത്. പെൺകുട്ടിയെ പീഡിപ്പിച്ചവർക്കെതിരെ പെൺകുട്ടിയുടെ പിതാവ് പോലീസ് സ്റ്റേഷനിൽ പരാതി നൽകി. തുടർന്ന് മുഴുവൻ പ്രതികളെയും പോലീസ് അറസ്റ്റ് ചെയ്തു.