പിതാവിനെ വെട്ടിനുറുക്കി ബാഗുകളിലാക്കി: മകൻ അറസ്റ്റിൽ

ന്യൂഡൽഹി: തുടർച്ചയായ സ്വത്ത് തർക്കത്തെ തുടർന്ന് ഫർഷ് ബസാർ സ്വദേശിയെ മകൻ വെട്ടിക്കൊലപ്പെടുത്തി. സന്ദേശ് അഗർവാളി(44) നെയാണ് 22 കാരനായ മകൻ അമൻ കുമാർ വെട്ടി കൊലപ്പെടുത്തിയത്. അമനെ പോലീസ് അറസ്റ്റ് ചെയ്തു.

നിരന്തരം സ്വത്ത് തർക്കമുണ്ടായിരുന്നതിനാൽ മദ്യലഹരിയിലാണ് പിതാവിനെ കൊലപ്പെടുത്തിയതെന്ന് അമൻ പൊലീസിന് മൊഴി നൽകി. ഒരു മാസം മുൻപ് സന്ദേശിനെ കൊലപ്പെടുത്തുമെന്ന് അമൻ ഭീഷണിപ്പെടുത്തിയിരുന്നു. സന്ദേശിന്റെ ഭാര്യക്കും മകൾക്കും സംഭവത്തിൽ പങ്കുണ്ടോയെന്ന് പോലീസ് അന്വേഷിക്കുന്നുണ്ട്.

സന്ദേശിന്റെ സ്വത്തിന്റെ പകുതി നേരത്തെ അമന് നൽകിയിരുന്നു.എന്നാൽ, സന്ദേശ് നടത്തിയിരുന്ന കടയും നൽകണമെന്നായിരുന്നു അമന്റെ ആവശ്യം. സന്ദേശിനെ വെട്ടിക്കൊലപ്പെടുത്തി 25 കഷണങ്ങളാക്കി പ്ലാസ്റ്റിക് ബാഗുകളിലാക്കി വീടിന് പുറത്ത് വെച്ചിരിക്കുകയായിരുന്നു അമൻ. നാലു ബാഗുകളിലായിരുന്നു അമൻ പിതാവിന്റെ ശരീരം വെട്ടി നുറുക്കി വെച്ചിരുന്നത്.