ദളിത് യുവാവിനെ വിവാഹം കഴിക്കാന്‍ തീരുമാനിച്ച മകളെ അമ്മ ചുട്ടുകൊന്നു

തിരുച്ചിറപ്പള്ളി: ദളിത് യുവാവിനെ വിവാഹം കഴിക്കാന്‍ തീരുമാനിച്ചതിന് മകളെ അമ്മ ചുട്ടു കൊന്നു. തമിഴ്‍നാട്ടിലെ നാഗപട്ടണത്താണ് സംഭവം. പ്ലസ് ടു വിദ്യാര്‍ത്ഥിനിയായ 17 കാരിയാണ് മരിച്ചത്. സമീപവാസിയായ രാജ് കുമാര്‍ എന്ന ദളിത് യുവാവുമായി പെണ്‍കുട്ടി പ്രണയത്തിലായിരുന്നു. പെണ്‍കുട്ടിക്ക് അടുത്ത ഞായറാഴ്‍ച 18 വയസ്സ് തികയുമെന്നതിനാല്‍ തിങ്കളാഴ്‍ച ഇവരുടെ വിവാഹം നടത്താന്‍ യുവാവിന്‍റെ ബന്ധുക്കള്‍ തീരുമാനിച്ചിരുന്നു.

Also Read:ഡിആര്‍ഐ റെയ്‍ഡിനിടെ ആറാം നിലയിലെ ഓഫീസില്‍ നിന്ന് പണം പുറത്തേക്ക് വലിച്ചെറിഞ്ഞു; റോഡില്‍ 'നോട്ട് മഴ'

എന്നാല്‍ ഈ വിവാഹം നടക്കാതിരിക്കാന്‍ പെണ്‍കുട്ടിയുടെ ദേഹത്ത് അമ്മ മണ്ണെണ്ണയൊഴിച്ച് തീ കൊളുത്തുകയായിരുന്നു. ഗുരുതരമായി പൊള്ളലേറ്റ പെണ്‍കുട്ടിയെ അയല്‍വാസികള്‍ ചേര്‍ന്ന് നാഗപട്ടണത്തെ സര്‍ക്കാര്‍ ആശുപത്രിയില്‍ എത്തിച്ചെങ്കിലും ചികിത്സയിലിരിക്കെ മരിച്ചു. പെണ്‍കുട്ടിയുടെ അമ്മയും ശരീരത്തില്‍ പൊള്ളലേറ്റ് ചികിത്സയിലാണ്. ഇവര്‍ക്ക് 80 ശതമാനത്തോളം പൊള്ളലേറ്റിട്ടുണ്ട്. ദളിത് യുവാവുമായുള്ള ബന്ധം അറിഞ്ഞതിനെ തുടര്‍ന്ന് പെണ്‍കുട്ടിയോട് ഇതില്‍ നിന്ന് പിന്‍മാറാന്‍ അമ്മ ആവശ്യപ്പെട്ടിരുന്നതായി പോലീസ് പറഞ്ഞു.

Also Read:വീണ്ടും ആൾക്കൂട്ടക്കൊലപാതകം; ദളിത് യുവാവിനെ കൊന്നത് കെട്ടിയിട്ട് മർദ്ദിച്ച്; ദാഹിച്ചപ്പോൾ കുടിക്കാൻ നൽകിയത് മൂത്രം

സ്വന്തം സമുദായത്തിലുള്ള ഒരാളെ വിവാഹം കഴിക്കണമെന്നായിരുന്നു പെണ്‍കുട്ടിയുടെ അമ്മയുടെ ആവശ്യം. തിങ്കളാഴ്ച ദളിത് യുവാവുമായുള്ള പെണ്‍കുട്ടിയുടെ വിവാഹം നടത്താന്‍ നിശ്ചയിച്ചതായി അറിഞ്ഞ അമ്മ മകളോട് ഇതില്‍ നിന്ന് പിന്‍മാറാന്‍ ആവശ്യപ്പെട്ട് കഴിഞ്ഞ ദിവസം തര്‍ക്കമുണ്ടായി. ഇതിനു ശേഷം ഉറങ്ങാന്‍ കിടന്ന മകളെ അമ്മ മണ്ണെണ്ണ ദേഹത്തൊഴിച്ച് തീ കൊളുത്തുകയായിരുന്നെന്ന് പോലീസ് പറഞ്ഞു. നിലവിളി കേട്ട് ഓടിയെത്തിയ സമീപവാസികളാണ് പൊള്ളലേറ്റ പെണ്‍കുട്ടിയെയും അമ്മയെയും ആശുപത്രിയില്‍ എത്തിച്ചത്.