കൊൽക്കത്ത: പ്രശസ്ത നടിയും തൃണമുൽ കോൺഗ്രസ് എംപിയുമായ മിമി ചക്രബർത്തിയോട് മോശമായി പെരുമാറിയ ടാക്സി ഡ്രൈവർ പിടിയിൽ. ഇന്നലെ എംപി കാറിൽ യാത്ര ചെയ്യവേ അപമര്യാദയായി പെരുമാറിയ മറ്റൊരു വാഹനത്തിന്റെ ഡ്രൈവറാണ് പിടിയിലായിരിക്കുന്നതെന്ന് ദേശീയ മാധ്യമമായ ഇന്ത്യാ ടുഡേയാണ് റിപ്പോർട്ട് ചെയ്തിരിക്കുന്നത്.
എംപിയുടെ പരാതിയിൽ ലക്ഷ്മൺ യാദവ് എന്ന മുപ്പത്തിരണ്ടുകാരനാണ് അറസ്റ്റിലായിരിക്കുന്നത്. തിങ്കളാഴ്ച ബാലിഗഞ്ച് ഫാരി പ്രദേശത്ത് വെച്ചാണ് സംഭവം നടന്നത്. ഇതിനു പിന്നാലെ തന്നെ എംപി ഗാരിയാഹട്ട് പോലീസ് സ്റ്റേഷനിലെത്തി പരാതി നൽകുകയായിരുന്നു. 'ബാലിഗഞ്ചിൽ നിന്ന് ഗരിയാഹട്ടിലേക്ക് കാറിൽ യാത്ര ചെയ്യവെ, ഒരു ടാക്സി ഡ്രൈവർ തനിക്കെതിരെ മോശം പരാമർശങ്ങൾ നടത്തി.' എന്നായിരുന്നു തൃണമുൽ എംപി പോലീസിന് നൽകിയ പരാതി.
Also Read: ലൈംഗിക തൊഴിലാളികൾ വീണ്ടും ജോലിയിലേക്ക്; കൊവിഡ് സാഹചര്യത്തിൽ ഇക്കാര്യങ്ങൾ നിർബന്ധം
മിമി ചക്രബർത്തി കാറിൽ യാത്ര ചെയ്യവെ ടാക്സി ഡ്രൈവർ മോശം പരാമർശങ്ങൾ നടത്തിയെങ്കിലും ആദ്യം ഇവർ അത് അവഗണിക്കുകയായിരുന്നു. എന്നാൽ വീണ്ടും കാറിനെ ഓവർടേക്ക് ചെയ്ത് ടാക്സി ഡ്രൈവർ മോശം ആഗ്യം കാണിച്ചതോടെ മിമി ഡ്രൈവറെ പിടികൂടാൻ ശ്രമിക്കുകയായിരുന്നെന്നാണ് റിപ്പോർട്ട്.
'ഞാൻ ഇപ്പോൾ ഇത് അവഗണിക്കുകയാണെങ്കിൽ, മറ്റൊരു സ്ത്രീ ആ ടാക്സിയിൽ യാത്ര ചെയ്താൽ ഉപദ്രവമുണ്ടാകുമെന്ന് എനിക്ക് തോന്നി. രാത്രിയിൽ അവന്റെ ടാക്സിയിൽ അവർ സുരക്ഷിതയായിരിക്കില്ല,' മിമി പറഞ്ഞു. പരാതിയുടെ അടിസ്ഥാനത്തിൽ നടത്തിയ അന്വേഷണത്തിനൊടുവിലാണ് കൊൽക്കത്ത പോലീസ് പ്രതിയെ പിടികൂടിയത്. ടാക്സി ഡ്രൈവർക്കെതിരെ ഐപിസി സെക്ഷൻ 354, 354 എ, 354 ഡി, 509 എന്നീ വകുപ്പുകളാണ് ചുമത്തിയിരിക്കുന്നത്.