കൊച്ചിയിൽ വിദ്യാർഥിനിയെ അപമാനിച്ച ടാക്സി ഡ്രൈവർ അറസ്റ്റിൽ

കൊച്ചി: ട്യൂഷൻ കഴിഞ്ഞു വീട്ടിലേക്ക് മടങ്ങിയ പെൺകുട്ടിയെ അപമാനിച്ച ഡ്രൈവർ കസ്റ്റഡിയിൽ. ഡ്രൈവർക്കെതിരെ പോക്സോ നിയമപ്രകാരം കേസെടുത്തു. ഏലൂർ സ്വദേശി യൂസഫ് (52)നെയാണ് പോലീസ് അറസ്റ്റ് ചെയ്തത്. ട്യൂഷൻ കഴിഞ്ഞു രാത്രിയിൽ ഓൺലൈൻ ടാക്‌സിയിൽ മടങ്ങിയ പെൺകുട്ടിയെയാണ് കാർ ഡ്രൈവറായ യൂസഫ് അപമാനിച്ചത്.

വിദ്യാർഥിനിക്ക് രാത്രി എട്ട് മണി വരെയാണ് ട്യൂഷൻ ഉള്ളത്. ട്യൂഷന് ശേഷം ഓൺലൈൻ ടാക്‌സിയിലോ ഓട്ടോറിക്ഷയിലോ ആണ് വിദ്യാർഥിനി സ്ഥിരമായി വീട്ടിലേക്ക് മടങ്ങിയിരുന്നത്. കഴിഞ്ഞ ദിവസം പതിവുപോലെ ഓൺലൈൻ ടാക്‌സിയിൽ വീട്ടിലേക്ക് മടങ്ങുന്നതിനിടെയാണ് പെൺകുട്ടിക്ക് ദുരനുഭവം ഉണ്ടായത്.

കൊച്ചി കാക്കനാട് കെന്നഡി മുക്കിൽ നിന്നാണ് ട്യൂഷൻ കഴിഞ്ഞ ശേഷം പെൺകുട്ടി ടാക്‌സിയിൽ കയറിയത്. ഡ്രൈവർ അപമാനിച്ചതോടെ പെൺകുട്ടി ടാക്‌സിയിൽ നിന്ന് രക്ഷപെടാൻ തീരുമാനിച്ചു. യാത്രക്കിടെ റോഡിൽ ട്രാഫിക് ബ്ലോക്കുണ്ടായ സ്ഥലത്ത് വെച്ച് പെൺകുട്ടി ഡോർ തുറന്ന് രക്ഷപെട്ടു. പെൺകുട്ടി രക്ഷപെട്ട ഉടനെ കാറിൽ നിന്ന് രക്ഷപെടാൻ ശ്രമിച്ച യൂസഫിനെ പോലീസ് പിടികൂടി.