കുട്ടിയുണ്ടാകാൻ ദീപാവലി രാത്രിയിൽ നരബലി; അമ്മാവൻ പത്ത് വയസുകാരനെ കഴുത്തറത്ത് കൊന്നു

പാട്‌ന/ഭഗൽപൂർ: കുട്ടികൾ ഉണ്ടാകാൻ മന്ത്രവാദിയുടെ നിർദേശത്താൽ 10വയസുകാരനെ അമ്മാവൻ ബലികൊടുത്തു. മൂന്നാം ക്ലാസ് വിദ്യാർഥിയായ കൻഹയ്യ കുമാറിനെ അമ്മാവൻ ശിവാനന്ദൻ രവിദാസ്(40) കഴുത്തറത്ത് കൊല്ലുകയായിരുന്നു. ബിഹാറിലെ ഭഗൽപൂർ ജില്ലയിലെ പിർപൈന്തി പോലീസ് സ്‌റ്റേഷൻ പരിധിയിൽ ദീപാവലി രാത്രിയിലാണ് നരബലി നടന്നത്.

മന്ത്രവാദി വിലാസ് മാണ്ഡലിനെയും ശിവാനന്ദനെയും പോലീസ് അറസ്‌റ്റ് ചെയ്‌തു. തിങ്കളാഴ്‌ചയാണ് കുട്ടിയുടെ മൃതദേഹം ഗ്രാമത്തിലെ ആളൊഴിഞ്ഞ പ്രദേശത്ത് നിന്നും ലഭിച്ചത്. പോലീസ് നടത്തിയ അന്വേഷണത്തിൽ നരബലി നടന്നതായി വ്യക്തമായി. തുടർന്ന് കുട്ടിയുടെ അമ്മാവനും മന്ത്രവാദിയും അറസ്‌റ്റിലാകുകയായിരുന്നു.കുട്ടികൾ ഉണ്ടാകാൻ നരമ്പലി നടത്തണമെന്ന് ശിവാനന്ദനോട് മന്ത്രിവാദി നിർദേശിക്കുകയായിരുന്നു. ഇതനുസരിച്ച് കഴിഞ്ഞ ഞായറാഴ്‌ച രാത്രി പടക്കങ്ങൾ നൽകാമെന്ന് വാഗ്ദാനം ചെയ്‌ത് കുട്ടിയെ വീട്ടിൽ നിന്നും കൂട്ടിക്കൊണ്ടു പോയി. ആളൊഴിഞ്ഞ സ്ഥലത്ത് എത്തിച്ച കൻഹയ്യയെ മന്ത്രവാദിയുടെ സാന്നിധ്യത്തിൽ പ്രതി കഴുത്തറത്ത് കൊലപ്പെടുത്തി. തുടർന്ന് മൃതദേഹം സമീപത്തെ ആളൊഴിഞ്ഞ പ്രദേശത്ത് ഉപേക്ഷിച്ചു.

കുട്ടിയെ കാണാതായതോടെ രാത്രി മുഴുവൻ കുടുംബം അന്വേഷണം നടത്തി. ശിവാനന്ദനെ ഈ സമയം കാണാതായത് സംശയം ഉണ്ടാക്കി. തിങ്കളാഴ്‌ച രാവിലെ ഏഴുമണിയോടെ കൻഹയ്യയെ കൊല്ലപ്പെട്ട നിലയിൽ സമീപവാസികൾ കണ്ടെത്തുകയായിരുന്നു. കോടതിയിൽ ഹാജരാക്കിയ ശിവാനന്ദനെയും മന്ത്രവാദിയേയും കോടതി 14 ദിവസത്തെ ജുഡീഷ്യൽ കസ്‌റ്റഡിയിൽ വിട്ടു.