ഒരാളെക്കൂടി വിവാഹം കഴിക്കാനനുവദിക്കണമെന്ന് ഭർത്താവ്; വെട്ടിക്കൊന്ന് പോലീസിൽ കീഴടങ്ങി ഭാര്യ

തൂത്തുക്കുടി: ബന്ധുവായ സ്ത്രീയെ വിവാഹം കഴിക്കാൻ താൽപര്യം അറിയിച്ച ഭർത്താവിനെ വെട്ടിക്കൊന്ന് ഭാര്യ. തമിഴ്നാട് തൂത്തുക്കിടിയിലാണ് സംഭവം. പ്രഭു എന്നയാളാണ് കൊല്ലപ്പെട്ടത്. ഉമാമഹേശ്വരി (30) ആണ് ഭർത്താവിനെ വെട്ടി കൊന്നത്. കൃത്യം നടത്തിയ ശേഷം ഇവർ കോവിൽപ്പട്ടിയിലുള്ള പോലീസ് സ്റ്റേഷനിൽ സ്വമേധയാ കീഴടങ്ങുകയായിരുന്നു.

ദമ്പതികൾക്ക് രണ്ട് മക്കളുണ്ട്. ഇവർ തമ്മിൽ വഴക്ക് പതിവായിരുന്നുവെന്ന് അയൽവാസികൾ പറയുന്നു. മദ്യപിച്ചെത്തുന്ന പ്രഭു ഭാര്യയുമായി വഴക്കിടാറുണ്ടായിരുന്നുവെന്നാണ് അയൽക്കാർ പറയുന്നത്. വെള്ളിയാഴ്ച രാത്രിയുണ്ടായ വഴക്കാണ് കൊലപാതകത്തിൽ കലാശിച്ചത്.

വഴക്കിനിടെ ബന്ധുവായ സ്ത്രീയെ വിവാഹം കഴിക്കാൻ അനുവദിക്കണമെന്ന് പ്രഭു പറഞ്ഞു. ഇതിനിടെ കത്തിയെടുത്ത് ഉമാമഹേശ്വരി പ്രഭുവിനെ വെട്ടുകയായിരുന്നു. പ്രഭുവിന്റെ മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി.