ലോക്ക്ഡൗണിനിടെ കാറപകടം; രണ്ടു സ്ത്രീകളടക്കം മൂന്നു കാൽനട യാത്രക്കാർ കൊല്ലപ്പെട്ടു

മധുര: ലോക്ക്ഡൗൺ നിർദ്ദേശങ്ങൾ ലംഘിച്ച് നിരത്തിലിറക്കിയ എസ്‍യുവി കാർ അപകടത്തിൽപ്പെട്ട് രണ്ടു സ്ത്രീകളടക്കം മൂന്നു കാൽനട യാത്രക്കാർ കൊല്ലപ്പെട്ടു. ചൊവ്വാഴ്ച രാവിലെ തമിഴ്നാട്ടിലെ തെങ്കാശിയ്ക്ക് സമീപം കലുനീർക്കുളത്താണ് അപകടം നടന്നത്. കാർഷിക തൊഴിലാളികളായി എം മദസാമി (59), എം തുരൈച്ചി (55), എം പൊന്നമ്മാൾ (60) എന്നിവരാണ് മരിച്ചത്.
‌
സംഭവം നടന്ന ദിവസം രാവിലെ ഏഴുമണിക്ക് വികെ പുദൂരിലേക്ക് കാൽനടയായി പോകുകയായിരുന്ന മൂവർസംഘത്തിന് നേരെ അമിതവേഗത്തിലെത്തിയ എസ്‍യുവി കാർ ഇടിച്ചുകയറുകയായിരുന്നു. സംഭവസ്ഥലത്തുവച്ച് തന്നെ മൂന്നുപേരും കൊല്ലപ്പെട്ടു. മൂന്നുപേരുടെയും മൃതദേഹം പോസ്റ്റുമോർട്ടത്തിനായി തെങ്കാശി ജനറൽ ആശുപത്രിയിലേക്ക് അയച്ചു. കേസിൽ വാഹനത്തിന്റെ ഉടമയും സംഭവം നടന്നപ്പോൾ കാർ ഓടിക്കുകയും ചെയ്തിരുന്ന അകാരകാട്ട് സ്വദേശിയായ ജെ ജോൺസ് ആന്റണി (32)യെ പോലീസ് അറസ്റ്റ് ചെയ്തു.

Also Read: പൂട്ടിയിട്ട മദ്യക്കടയിൽനിന്ന് മദ്യം കടത്തി മറിച്ചുവിറ്റു; തഹസിൽദാർ അടക്കം മൂന്ന് പേർ അറസ്റ്റിൽ

സഹോദരിയെ തിരുനെൽവേലിയിലെ ഭർത്താവിന്റെ വീട്ടിലേക്ക് കൊണ്ടുവിട്ട് മടങ്ങുകയായിരുന്നു ജോൺസ്. ഇതിനിടെയായിരുന്നു അപകടം സംഭവിച്ചത്. ഇയാൾ ഉറങ്ങി പോയതാണ് അപകട കാരണമെന്നും കേസ് അന്വേഷണ ഉദ്യോഗസ്ഥ കെ മാരീശ്വരി പറ‍ഞ്ഞു. ലോക്ക്ഡൗണിനിടെ വാഹനം നിരത്തിലിറക്കാനുള്ള അനുവാദം പ്രതി അധികൃതരിൽനിന്ന് വാങ്ങിയിരുന്നില്ലെന്നും പോലീസ് പറ‍ഞ്ഞു. അപകടത്തിൽ പരിക്കേറ്റ ജോൺസിനെ ആശുപത്രിയിൽ പ്രവേശിപ്പിച്ചു.