ടിവി സീരിയൽ കാണുന്നതിനെച്ചൊല്ലി തർക്കം; വിഷം കഴിച്ച് ആത്മഹത്യയ്ക്ക് ശ്രമിച്ച് സഹോദരിമാർ, ഒരാൾ മരിച്ചു

ലക്നൗ: ടെലിവിഷൻ സീരിയൽ കാണുന്നതിനെച്ചൊല്ലിയുണ്ടായ തർക്കത്തെ തുടർന്ന് സഹോദരിമാർ വിഷം കഴിച്ച് ആത്മഹത്യയ്ക്ക് ശ്രമിച്ചു. ഗുരുതരാവസ്ഥയിലായ മൂന്ന് സഹോദരിമാരെ ആശുപത്രിയിൽ എത്തിച്ചിരുന്നെങ്കിലും ഇതിൽ ഒരാൾ മരിച്ചു. മറ്റു രണ്ടുപേർ ചികിത്സയിൽ തുടരുകയാണ്. ഉത്തർപ്രദേശിലെ സഹാറൻപൂർ ജില്ലയിലെ നംഗൽ പോലീസ് സ്റ്റേഷൻ പരിധിയിലുള്ള ഭലസ്വ ഗ്രാമത്തിലാണ് സംഭവം.

സംഭവം നടന്ന ദിവസം വീട്ടുജോലികൾ തീർത്ത് ടിവി കാണാനായി ഇരുന്നതായിരുന്നു റിത, ശീതൽ, തനു എന്നീ മൂന്ന് സഹോദരിമാർ. ഇതിനിടെ ഇഷ്ടപ്പെട്ട സീരിയൽ കാണുന്നതിനെച്ചൊല്ലി ഇവർ തർക്കത്തിലായി. തർക്കംമൂത്തതോടെ പ്രാണികളിൽ നിന്ന് ഗോതമ്പ് സുരക്ഷിതമായി സൂക്ഷിക്കുന്നതിനായുള്ള കീടനാശിനി എടുത്ത് ഇവർ മൂന്നുപേരും ചേർന്ന് കുടിച്ചു. വിവരമറിഞ്ഞ വീട്ടുകാരും നാട്ടുകാരും ചേർന്ന് സഹോദരിമാരെ ഉടൻ ആശുപത്രിയിൽ എത്തിച്ചു.

Also Read: പണത്തെച്ചൊല്ലി നിരന്തര തർക്കം; പങ്കാളിയും പെൺമക്കളും ചേർന്ന് യുവതിയെ കഴുത്തുഞെരിച്ച് കൊന്നു

ചികിത്സയ്ക്കിടെ റിത മരിച്ചു. ശീതളിന്റെയും തനുവിന്റെയും നില ഗുരുതരമായി തുടരുകയാണെന്ന് ആശുപത്രി അധികൃതർ പറഞ്ഞു. റിതയുടെ മൃതദേഹം പോസ്റ്റ്‌മോർട്ടത്തിനായി അയച്ചു. അതേസമയം സംഭവത്തിൽ നാട്ടുകാർ ദുരൂഹതയാരോപിച്ചതിനെ തുടർന്ന് പോലീസ് അന്വേഷണം ആരംഭിച്ചു.