കൊല്ലം: പ്രണയ ബന്ധത്തെച്ചൊല്ലിയുള്ള തർക്കത്തെത്തുടർന്ന് കൊല്ലം കണ്ണനല്ലൂരിൽ യുവാവിനെ കുത്തിക്കൊന്നു. പള്ളിമൺ സ്വദേശി ആദർശാണ് (23) കൊല്ലപ്പെട്ടത്. പെൺകുട്ടിയുടെ ബന്ധുവായ മുഖ്യപ്രതി പോലീസ് സ്റ്റേഷനിൽ കീഴടങ്ങി. കൂട്ടുപ്രതികൾ ഒളിവിലാണ്. ശനിയാഴ്ച രാത്രിയാണ് സംഭവം.
ബന്ധുവിന്റെ മരണാനന്തര ചടങ്ങിൽ പങ്കെടുക്കാനെത്തിയ ആദർശിനെ രാത്രി പത്തുമണിയോടെ മൂന്നംഗ സംഘം വിളിച്ചിറക്കി. വാക്കേറ്റത്തിനിടെ മൂർച്ചയുള്ള ആയുധംകൊണ്ട് ആദർശിന്റെ കഴുത്തിൽ പ്രതി കുത്തുകയായിരുന്നു. യുവാവിന്റെ നിലവിളികേട്ടെത്തിയ നാട്ടുകാർ ഉടൻതന്നെ ആശുപത്രിയിൽ പ്രവേശിപ്പിച്ചെങ്കിലും ജീവൻ നഷ്ടപ്പെടുകയായിരുന്നു.
യുവാവിനെ കുത്തി വീഴ്ത്തിയ ശേഷം മുഖ്യപ്രതി രാമൻ കണ്ണനല്ലൂർ പോലീസ് സ്റ്റേഷനിലെത്തി കീഴടങ്ങി. കൂട്ടുപ്രതികളായ ജ്യോതി, സുനി എന്നിവർ ഒളിവിലാണെന്ന് പോലീസ് പറഞ്ഞു. പ്രതി രാമന്റെ ബന്ധുവായ യുവതിയും ആദർശും തമ്മിൽ പ്രണയത്തിലായിരുന്നുവെന്ന് പോലീസ് പറഞ്ഞു.
പ്രണയത്തെച്ചൊല്ലി രാമനും ആദർശും നേരത്തെ വാക്കുതർക്കം ഉണ്ടായിട്ടുണ്ട്. തിരുവനന്തപുരം മെഡിക്കൽ കോളേജിലെ പോസ്റ്റ്മോർട്ടത്തിനു ശേഷം ആദർശിന്റെ മൃതദേഹം കുടുംബക്കാർക്ക് വിട്ടുനൽകി.