സാനിറ്ററി നാപ്കിനില്‍ സ്വർണം ഒളിപ്പിച്ച് കടത്താന്‍ ശ്രമം; രണ്ട് സ്ത്രീകള്‍ പിടിയില്‍

ധരിച്ചിരുന്ന സാനിറ്ററി പാഡുകൾക്കുള്ളിൽ സ്വർണ്ണം പേസ്റ്റ് രൂപത്തിൽ ആക്കി ഒളിപ്പിച്ച് കടത്താന്‍ ശ്രമിച്ച രണ്ട് സ്ത്രീകള്‍ പിടിയില്‍. കോയമ്പത്തൂർ അന്താരാഷ്ട്ര വിമാനത്താവളത്തിൽ നിന്നാണ് ദിവാനി രാധാകൃഷ്ണ, വസന്തി രാമസ്വാമി എന്നീ രണ്ട് സ്ത്രീകളെ കസ്റ്റംസ് വകുപ്പ് ഇന്നലെ പുര്‍ച്ചെ കസ്റ്റഡിയിലെടുത്തത്. എയർ അറേബ്യ വിമാനത്തിൽ ഷാർജയിൽ നിന്ന് കോയമ്പത്തൂരിൽ എത്തിയതായിരുന്നു സ്ത്രീകള്‍.

സംശയം തോന്നിയ കസ്റ്റംസ് ഉദ്യോഗസ്ഥർ ഒരു മെറ്റൽ ഡിറ്റക്ടർ ഉപയോഗിച്ച് പരിശോധിച്ചപ്പോൾ ആണ് അവർ ധരിച്ചിരുന്ന സാനിറ്ററി നാപ്കിനുകൾക്കുള്ളിൽ സ്വർണ്ണം പേസ്റ്റ് രൂപത്തിൽ ഒളിപ്പിച്ചതായി കണ്ടെത്തിയത്. ഉടന്‍ തന്നെ രണ്ട് പേരെയും കസ്റ്റഡിയില്‍ എടുത്തു.

Also Read: ഭാര്യയെ മര്‍ദ്ദിക്കുന്ന വീഡിയോ വൈറലായി; പിന്നാലെ പോലീസുകാരന് സസ്‌പെന്‍ഷന്‍

62.46 ലക്ഷം രൂപ വിലമതിക്കുന്ന 1,195.6 ഗ്രാം സ്വർണം ആണ് സാനിറ്ററി പാഡുകൾക്കുള്ളിൽ നിന്നും പുറത്തെടുത്തതെന്ന് കസ്റ്റംസ് ഓഫീസര്‍ ടൈംസ് ഓഫ് ഇന്ത്യയോട് പറഞ്ഞു . ഇവരെ കൂടാതെ ഇതേ വിമാനത്തില്‍ എത്തിയ അഞ്ച് പേരില്‍ നിന്നും 46 ലക്ഷം രൂപ വിലമതിക്കുന്ന സ്വർണം, മദ്യം, സിഗരറ്റ് എന്നിവയും പിടികൂടി. ഇതില്‍ രണ്ട് പേര്‍ ചെന്നൈ സ്വദേശികള്‍ ആണ്.