കുഞ്ഞിന്‍റെ മൃതദേഹം അമ്മ കുഴിച്ചു മൂടി വീടിന് തീവെച്ചു

ലഖ്‌നൗ: മാനസിക പ്രയാസമുള്ള സ്ത്രീ മരിച്ചു പോയ മകളെ വീടിനുള്ളിൽ കുഴിച്ച് മൂടി വീടിന് തീ വെച്ചു. രണ്ടു മാസം പ്രായമുള്ള കുട്ടിയാണ് മരിച്ചത്. മകളുടെ അസുഖത്തെ തുടർന്ന് പലവിധ ചികിത്സ നൽകിയെങ്കിലും ഫലമുണ്ടായില്ല. കുഞ്ഞിന്റെ വിട്ടുമാറാത്ത രോഗത്തെ തുടർന്ന് അമ്മക്ക് മാനസിക പ്രയാസം ഉണ്ടായി.

ചികിത്സ നൽകിയിട്ടും കുഞ്ഞ് മരിച്ചത് യുവതിയെ കടുത്ത മനോവിഷമത്തിലാക്കി. കുഞ്ഞ് മരിച്ചെന്ന് അവർ അയൽക്കാരെ അറിയിക്കുകയും ചെയ്തു. തുടർന്നാണ് യുവതി കുഞ്ഞിനെ വീടിനുള്ളിൽ തന്നെ അടക്കം ചെയ്ത ശേഷം തീ കൊളുത്തിയത്.

പോലീസ് വീടിനുള്ളിൽ പരിശോധന നടത്തി കുഞ്ഞിന്റെ മൃതദേഹം കണ്ടെത്തി പോസ്റ്റുമോർട്ടത്തിന് അയച്ചു. യുവതിയെ പോലീസ് കസ്റ്റഡിയിലെടുത്തു. കുട്ടിയുടെ മരണം എങ്ങനെ സംഭവിച്ചു എന്നതടക്കമുള്ള കാര്യങ്ങൾ പോലീസ് അന്വേഷിച്ചു വരികയാണ്. യുവതി ഇപ്പോൾ പോലീസ് കസ്റ്റഡിയിലാണ്.