ഭാര്യയുടെ തലയറുത്തെടുത്ത് റോഡിലൂടെ നടന്നു: പിന്നീട് പോലീസിൽ കീഴടങ്ങി

വിജയവാഡ: ഭാര്യയുടെ തല അറുത്തെടുത്ത് റോഡിലൂടെ നടന്നു നീങ്ങിയ ആൾ പോലീസിൽ കീഴടങ്ങി. ആന്ധ്രപ്രദേശിലെ സത്യനാരായണപുരം പോലീസ് സ്റ്റേഷൻ പരിധിയിലാണ് സംഭവം നടന്നത്.

മണിക്രാന്തി (23) എന്ന യുവതിയെയാണ് ഭർത്താവ് ദാരുണമായി കൊലപ്പെടുത്തിയത്. പ്രദീപ് കുമാർ എന്നാണ് മണിക്രാന്തിയുടെ ഭർത്താവിന്റെ പേര്. ഇരുവരും അഞ്ച് വർഷം മുൻപ് പ്രണയിച്ച് വിവാഹം കഴിച്ചവരാണ്. വീടിന് സമീപത്ത് വെച്ച് ഭാര്യയെ കൊലപ്പെടുത്തിയ ശേഷം പ്രദീപ് കുമാർ അവരുടെ തലയറുത്ത് മാറ്റി.

ഒരു കൈയ്യിൽ ഭാര്യയുടെ തലയും മറു കൈയ്യിൽ കത്തിയുമായി പ്രദീപ് കുമാർ നടന്നു നീങ്ങുന്ന സിസിടിവി ദൃശ്യങ്ങൾ പൊലീസിന് ലഭിച്ചു. ഭാര്യയുടെ തല പ്രദീപ് കുമാർ പിന്നീട് കനാലിലേക്ക് വലിച്ചെറിഞ്ഞു. മണിക്രാന്തിയുടെ മൃതദേഹം പോലീസ് മോർച്ചറിയിലേക്ക് മാറ്റി. തല കണ്ടെത്താനുള്ള തെരച്ചിൽ പോലീസ് നടത്തി വരികയാണ്.

മണിക്രാന്തിയുടെ തല കനാലിലേക്ക് വലിച്ചെറിഞ്ഞ ശേഷം പ്രദീപ്‌ കുമാർ സ്വയം പോലീസിൽ കീഴടങ്ങുകയായിരുന്നു. പ്രണയിച്ച് വിവാഹം കഴിച്ച ശേഷം ഇരുവരും തമ്മിൽ നിരന്തരം വഴക്കുണ്ടാക്കിയിരുന്നു. പ്രദീപ് കുമാറിനെതിരെ മണിക്രാന്തി നേരത്തെ ഗാർഹികപീഡനത്തിന് പോലീസിൽ പരാതി നൽകിയിരുന്നു. മണിക്രാന്തിയുടെ പരാതിയിൽ അറസ്റ്റിലായ ഇയാൾ അടുത്തിടെയാണ് ജാമ്യത്തിലിറങ്ങിയത്. ഭാര്യയെ കൊല്ലാൻ തക്കവണ്ണം എന്ത് പ്രകോപനമാണ് ഉണ്ടായതെന്ന് ഇത് വരെ പൊലീസിന് വ്യക്തമല്ല.