പാവാട ധരിച്ചതിന് യുവതിയെ മ‍ര്‍ദ്ദിച്ചു; മൂന്ന് യുവാക്കൾക്കെതിരെ കേസ്

പാരീസ്: പാവാട ധരിച്ചതിന് യുവതിയെ മർദ്ദിച്ച മൂന്നു പേർക്കെതിരെ കേസ് രജിസ്റ്റർ ചെയ്ത് ഫ്രഞ്ച് പോലീസ്. സംഭവത്തിൽ ബുധനാഴ്ച സർക്കാർ അപലപിച്ചു. 22 കാരിക്കാണ് മർദ്ദനമേറ്റത്. യുവാക്കൾ തന്റെ മുഖത്ത് ഇടിച്ചതായാണ് യുവതിയുടെ പരാതി. സ്ട്രാസ്ബർഗിൽ വെള്ളിയാഴ്ച വൈകിട്ടാണ് സംഭവം.

Also Read: ഓട്ടിസം ബാധിച്ച 13 കാരനെ വെടിവെച്ച് പോലീസ്; നിറയൊഴിച്ചത് 11 തവണ

താൻ വീട്ടിലേക്ക് മടങ്ങുന്നതിനിടെ "പാവാട ധരിച്ച വേശ്യയെ നോക്കൂ" എന്ന് യുവാക്കൾ പറഞ്ഞതായി യുവതി ഫ്രാൻസ് ബ്ലൂ അൽസേസ് റേഡിയോയോട് പറഞ്ഞു. "അവരിൽ രണ്ടുപേർ തന്നെ പിടിച്ചുവെച്ചു. മൂന്നാമൻ തന്റെ മുഖത്ത് ഇടിച്ചു," യുവതി പറയുന്നു. സംഭവം നിരവധിപ്പേർ കണ്ടെങ്കിലും വിഷയത്തിൽ ആരും ഇടപെട്ടില്ലെന്നും യുവതി പരാതിപ്പെട്ടു. "സ്ത്രീകൾ പൊതുസ്ഥലത്ത് ആക്രമിക്കപ്പെടുമ്പോൾ നാം ഉറപ്പായും പ്രതികരിക്കണം." പോലീസിൽ വിവരം അറിയിക്കണമെന്നും മന്ത്രി മാർലി ഷിയപ്പ പറഞ്ഞു.

Also Read: തമിഴ്‌നാട്ടില്‍ മന്ത്രിയുടെ പിഎയെ പട്ടാപ്പകൽ അജ്ഞാത സംഘം തട്ടിക്കൊണ്ടുപോയി

മുറിവേറ്റ യുവതിയുടെ ചിത്രം ഫ്രാൻസ് ബ്ലൂ അൽസേസ് റേഡിയോ ട്വീറ്റ് ചെയ്തതിനെത്തുടർന്ന് നിരവിധി പേരാണ് പ്രതികരണം അറിയിച്ചത്. സംഭവം ഗുരുതരമാണെന്ന് സർക്കാർ വക്താവ് ഗബ്രിയേൽ അറ്റാൽ പറഞ്ഞു. "ആളുകൾക്ക് ഇഷ്ടമുള്ളതുപോലെ വസ്ത്രം ധരിച്ച് പുറത്തിറങ്ങാൻ കഴിയണം." വസ്ത്രത്തിന്റെ പേരിൽ സ്ത്രീകൾ അക്രമിക്കപ്പെടാൻ പാടില്ലെന്നും അദ്ദേഹം പറഞ്ഞു.