പുകവലിക്കുന്നത് തുറിച്ച് നോക്കി; 28കാരനെ യുവതി കുത്തിക്കൊന്നു

നാഗ്പുർ: താൻ പുകവലിക്കുന്നത് തുറിച്ചു നോക്കിയെന്ന് ആരോപിച്ച് യുവാവിനെ കുത്തിക്കൊന്ന് യുവതിയും കൂട്ടുകാരും. നാഗ്പുരിലെ മനേവാദ സിമന്റ് റോഡിലാണ് സംഭവം. രഞ്ജിത് റാത്തോഡ് എന്ന 28കാരനാണ് കൊല്ലപ്പെട്ടത്. ഇദ്ദേഹം വിവാഹിതനും നാല് പെൺകുട്ടികളുടെ പിതാവുമാണ്.

ശനിയാഴ്ച രാത്രിയിൽ ഒരു പാൻ കടയ്ക്കു മുമ്പിൽ സിഗരറ്റ് വലിച്ച് നിൽക്കുകയായിരുന്നു 24കാരിയായ ജയശ്രീ പന്ധാരെ എന്നയാളും കൂട്ടുകാരും. ഈ സമയത്ത് അങ്ങോട്ട് കടന്നുവന്ന രഞ്ജിത് റാത്തോഡ് തന്നെ തുറിച്ചുനോക്കി എന്നാരോപിച്ച് ജയശ്രീ തർക്കത്തിന് ചെന്നു. പാൻ കടയിൽ സിഗരറ്റ് വാങ്ങാൻ ചെന്നതായിരുന്നു രഞ്ജിത്.

രഞ്ജിത്ത് റാത്തോഡിന്റെ ഫോണിൽ നിന്ന് ജയശ്രീ പുക വലിച്ചൂതുന്നതിന്റെ ഒരു വീഡിയോ പോലീസ് കണ്ടെടുത്തിട്ടുണ്ട്. ജയശ്രീ രഞ്ജിത്തിനു നേർക്ക് പുക വലിച്ച് ഊതുന്നതായാണ് ദൃശ്യങ്ങളിലുള്ളത്. ഇരുവരും തമ്മിൽ തർക്കിക്കുന്നത് വീഡിയോ ദൃശ്യങ്ങളിലുണ്ട്. ജയശ്രീക്കൊപ്പം ഈ സമയത്ത് ഉണ്ടായിരുന്നത് സവിത സായരെ എന്ന ഒരു സുഹൃത്താണ്. പ്രശ്നം തുടങ്ങിയപ്പോൾ ഇരുവരും ചേർന്ന് ആകാശ് റൗത്ത്, ജീത്തു ജാദവ് എന്നീ രണ്ട് സുഹൃത്തുക്കളെക്കൂടി വിളിച്ചുവരുത്തി.

ഈ രണ്ടുപേരും സ്ഥലത്തെത്തുന്ന സമയത്തിനിടയിൽ രഞ്ജിത്ത് റാത്തോഡ് സ്ഥലം വിട്ടിരുന്നു. യാത്രാമധ്യേ അദ്ദേഹം മഹാലക്ഷ്മി നഗറിലെ ഒരു ബാറിൽ കയറി ബിയർ കഴിച്ചു. ഇവിടെ വെച്ചാണ് ജയശ്രീയും സുഹൃത്തുക്കളും ചേർന്ന് രഞ്ജിത്തിനെ പിടികൂടി ആക്രമിക്കുന്നത്. സിസിടിവി ദൃശ്യങ്ങളിൽ ജയശ്രീ കത്തി ഉപയോഗിച്ച് റാത്തോഡിനെ പലവട്ടം കുത്തുന്നത് കാണാം. ജയശ്രീ, സവിത, ആകാശ് എന്നിവർ പോലീസിന്റെ പിടിയിലായിട്ടുണ്ട്. അന്വേഷണം പുരോഗമിക്കുകയാണെന്ന് പോലീസ് അറിയിച്ചു.

ജയശ്രീയുടെ ഫോൺ ഗാലറിയിൽ മയക്കുമരുന്നുകളുടെ ചിത്രങ്ങളും മറ്റുമുള്ളത് പോലീസ് കണ്ടെടുത്തിട്ടുണ്ട്.