ക്ഷയ രോഗി ആയ 21കാരി ഐസിയുവിനുള്ളിൽ പീഡനത്തിനിരയായി; ദുരനുഭവം പുറത്തറിയിച്ചത് കുറിപ്പിലൂടെ

ഗുരുഗ്രാം: ക്ഷയ രോഗത്തെ തുടർന്ന് അബോധാവസ്ഥയിലായ നിലയിൽ ആശുപത്രിയിൽ പ്രവേശിക്കപ്പെട്ട ഇരുപത്തൊന്നുകാരി പീഡനത്തിനിരയായതായി പരാതി. ഹരിയാനയിലെ ഗുരുഗ്രാമിൽ സെക്ടർ 44ലെ ആശുപത്രിയിലാണ് സംഭവമെന്ന് ടൈംസ് നൗവാണ് റിപ്പോർട്ട് ചെയ്തത്. ആരോഗ്യനില മെച്ചപ്പെട്ടതോടെ യുവതി പിതാവിന് കുറിപ്പ് എഴുതി നൽകിയതോടെയാണ് സംഭവം പുറത്തറിയുന്നത്.

യുവതി അച്ഛനോട് കാര്യം പറഞ്ഞതിന് പിന്നാലെ തന്നെ ഇവർ പോലീസിൽ പരാതി നൽകുകയും ചെയ്തു. ഒക്ടോബർ 21നും 27നും ഇടയിലാണ് മകൾ പീഡനത്തിനിരയായതെന്നാണ് കരുതുന്നതെന്നാണ് കുടുംബം പറയുന്നത്. ഇരുപത്തൊന്നുകാരി ഐസിയുവിൽ വെന്‍റിലേറ്ററിന്‍റെ സഹായത്തോടെയായിരുന്നു കഴിഞ്ഞിരുന്നത്. ഈ സമയത്താണ് കേസിനാസ്പദമായ സംഭവം നടന്നത്.

Also Read : 35 ബലാത്സംഗങ്ങൾ; നീലചിത്ര വ്യവസാരംഗത്തെ രാജാവ്; 67 കാരൻ റോൺ ജെർമിയുടെ പതനം

ശ്വാസ തടസത്തെ തുടർന്ന് ഒക്ടോബർ 21നായിരുന്നു യുവതിയെ ആശുപത്രിയിൽ പ്രവേശിപ്പിക്കുന്നത്. പിന്നീട് ഐസിയുവിൽ പ്രത്യേക റൂമിലേക്ക് നിരീക്ഷണത്തിനായി മാറ്റിയ ഇവർക്ക് വെന്‍റിലേറ്റർ സൗകര്യം ഏർപ്പെടുത്തുകയായിരുന്നു. ചൊവ്വാഴ്ച, തന്നെ കാണാൻ പിതാവെത്തിയപ്പോഴാണ് ഇവർ കുറിപ്പ് കൈമാറുന്നത്. 'വികാസ്' എന്നവാക്കും ഇവർ പറഞ്ഞിരുന്നു.

ഇതിന് പിന്നാലെ പോലീസ് സ്റ്റേഷനിലെത്തി യുവതിയുടെ അച്ഛൻ പരാതി നൽകി. വാർഡിൽ ജോലി ചെയ്തിരുന്നവരെ ചോദ്യം ചെയ്തതിൽ നിന്നും, യുവതി പറഞ്ഞ പേരിന്‍റെ അടിസ്ഥാനത്തിലും പ്രതിയെ പോലീസ് തിരിച്ചറിഞ്ഞിട്ടുണ്ട്.

Also Read :'അരുതാത്ത സാഹചര്യത്തിൽ' കണ്ടു; പുറത്തറിയാതിരിക്കാൻ അമ്മായിഅമ്മയെ കൊലപ്പെടുത്തിയ മരുമകളും കാമുകനും അറസ്റ്റിൽ

നിലവിൽ മൊഴി രേഖപ്പെടുത്താനുള്ള ആരോഗ്യാവസ്ഥയിലല്ല യുവതിയെന്ന് പോലീസ് പറയുന്നു. ഡോക്ടർമാരുടെ ഒരു സംഘം യുവതി പരിശോധിച്ചതായും, ചികിത്സയിൽ തുടരുന്ന ഇവർക്ക് പോലീസ് സുരക്ഷ ഏർപ്പെടുത്തിയതായും കമ്മീഷണർ കെകെ റാവു വ്യക്തമാക്കി. കേസ് അന്വേഷണവുമായി സഹകരിക്കുമെന്ന് ആശുപത്രി അധികൃതരും പറഞ്ഞു.