45കാരനായ ഭർത്താവ് കോളേജ് വിദ്യാർഥിനിക്കൊപ്പം ഒളിച്ചോടി; യുവതിയും മക്കളും തീ കൊളുത്തി ആത്മഹത്യ ചെയ്‌തു

ചെന്നൈ: ഭർത്താവ് കോളേജ് വിദ്യാർഥിനിക്കൊപ്പം ഒളിച്ചോടിയതിനെത്തുടർന്ന് മക്കളെ കൊലപ്പെടുത്തി ശേഷം യുവതി ആത്മഹത്യ ചെയ്‌തു. തമിഴ്‌നാട്ടിലെ പുതുക്കോട്ട ജില്ലയിലെ അരന്താങ്ങിക്കടുത്താണ് സംഭവം. വല്ലമ്പക്കാട് സ്വദേശി മുത്തുവിൻ്റെ ഭാര്യ രാധ (34), മക്കളായ അഭിഷേക് (13), അഭിരിത് (9) എന്നിവരാണ് മരിച്ചത്. സംഭവത്തിൽ നാഗുടി പോലീസ് കേസ് രജിസ്‌റ്റർ ചെയ്‌ത് അന്വേഷണം ആരംഭിച്ചു.

Also Read: പിതാവ് മരിച്ചത് തലയടിച്ച് വീണത് മൂലമെന്ന് മൊഴി; പോസ്‌റ്റ്‌മോർട്ടം റിപ്പോർട്ട് വന്നപ്പോൾ മകൻ അറസ്‌റ്റിൽ

45കാരനായ മുത്തു ഗ്രാമത്തിലെ 22 വയസുള്ള കോളേജ് വിദ്യാർഥിനിയുമായി പ്രണയത്തിലായിരുന്നു. ഇവരുടെ ബന്ധമറിഞ്ഞ രാധ ബന്ധുക്കളെയും സ്വന്തം കുടുംബക്കാരെ അറിയിച്ചും ബന്ധം വിലക്കുകയും ചെയ്‌തിരുന്നു. പെൺകുട്ടിയെ കാണാൻ പാടില്ലെന്നും ബന്ധം തുടരരുതെന്നും മുത്തുവിനോട് ബന്ധുക്കൾ പറഞ്ഞിരുന്നു.

കുടുംബത്തിൽ നിന്ന് എതിർപ്പ് തുടരുന്നതിനിടെ മുത്തുവും പെൺകുട്ടിയും ഗ്രാമത്തിൽ നിന്ന് ഒളിച്ചോടി. മകളെ കാണാനില്ലെന്ന് വ്യക്തമാക്കി യുവതിയുടെ കുടുംബം പോലീസിൽ പരാതി നൽകുകയും ചെയ്‌തു. അന്വേഷണം മുത്തുവിലേക്ക് എത്തിയതോടെ അപമാനം മൂലം രാധ മാനസിക വിഷമത്തിലായിരുന്നു. ഈ സാഹചര്യത്തിലാണ് മക്കളെ കൊലപ്പെടുത്തി ജീവനൊടുക്കാൻ രാധ തീരുമാനിച്ചത്.

Also Read: ദേശീയ പാതയിൽ മക്കളുടെ മുന്നിൽ യുവതി ബലാത്സംഗത്തിനിരയായി, പാകിസ്ഥാനിൽ പ്രതിഷേധം

ഭക്ഷണത്തിൽ ഉറക്കഗുളിക നൽകി മയക്കി കിടത്തിയ ശേഷം വീട്ടിൽ കരുതിയിരുന്ന പെടോൾ കുട്ടികളുടെയും സ്വന്തം ശരീരത്തുമൊഴിച്ച് തീ കൊളുത്തുകയായിരുന്നു. വീട്ടിൽ നിന്നും ശബ്‌ദമുയർന്നതോടെ സമീപവാസികളെത്തി തീയണച്ചെങ്കിലും രാധയും അഭിരിത്തും മരിച്ചിരുന്നു. ഗുരുതരമായി പൊള്ളലേറ്റ അഭിഷേകിനെ പുതുക്കോട്ട ഗവ. മെഡിക്കൽ കോളേജ് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ഇവരെ രക്ഷിക്കാൻ ശ്രമിച്ച സമീപവാസികൾക്കും പൊള്ളലേറ്റു. ഇവരെ ആശുപത്രിയിൽ പ്രവേശിപ്പിച്ചിരിക്കുകയാണ്.