പ്ലസ് ടുക്കാരിയെ പട്ടാപ്പകൽ കുത്തിക്കൊന്നു; കുടുംബത്തിന് 10 ലക്ഷം രൂപ സഹായം പ്രഖ്യാപിച്ച് ആന്ധ്രാ മുഖ്യമന്ത്രി

വിശാഖപട്ടണം: നഗരത്തിലെ തിരക്കുള്ള റോഡിൽ പതിനേഴുകാരിയെ കുത്തിക്കൊന്നു. ആന്ധ്രാ പ്രദേശിലെ വിശാഖപട്ടണത്ത് ശനിയാഴ്ച വൈകുന്നേരമാണ് സംഭവമുണ്ടായത്. നഗരത്തോടു ചേര്‍ന്നുള്ള ഗജുവകയിൽ വെച്ചായിരുന്നു ആക്രമണമുണ്ടായത്. ഉടൻ തന്നെ പ്രദേശവാസികള്‍ ചേര്‍ന്ന് പെൺകുട്ടിയെ ആശുപത്രിയിലെത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല.

വീട്ടിലേയ്ക്കു മടങ്ങുന്ന വഴിയിൽ വെച്ചായിരുന്നു പ്ലസ് ടു വിദ്യാര്‍ഥിനിയായ പെൺകുട്ടിയുടെ കഴുത്തിനു കുത്തേറ്റത്. ആന്ധ്രാ സര്‍വകലാശാലയിലെ നിയമവിദ്യാര്‍ഥിയായ അഖിൽ (20) ആണ് പ്രതിയെന്നാണ് പോലീസ് പറയുന്നത്. പ്രതിയ്ക്കും കൊല്ലപ്പെട്ട പെൺകുട്ടിയ്ക്കും പരസ്പരം അറിയാമായിരുന്നുവെന്നും പോലീസ് വ്യക്തമാക്കി.

Also Read: കൊവിഡ് ഭേദമായി; പിന്നെ വൈറസ് മനഃപൂർവം ശരീരത്തിൽ സ്വീകരിച്ചു; പുതിയ കണ്ടെത്തലുമായി ഗവേഷകൻ

"അടുത്തിടെ മറ്റൊരു ആൺസുഹൃത്തിനോട് പെൺകുട്ടി സംസാരിച്ചു തുടങ്ങിയതാണ് പ്രതിയെ പ്രകോപിപ്പിച്ചത്. ഇതേത്തുടര്‍ന്ന് പെൺകുട്ടിയെ കുത്തിക്കൊല്ലുകയായിരുന്നു. ഇയാളെ പോലീസ് പിടികൂടിയിട്ടുണ്ട്." ഡിസിപി ഐശ്വര്യ രസ്തോഗി വ്യക്തമാക്കി. കുത്തേറ്റ ഉടൻ തന്നെ പ്രദേശവാസികള്‍ യുവതിയെ ആശുപത്രിയിലെത്തിച്ചെങ്കിലും മരിച്ച നിലയിലാണ് യുവതിയെ എത്തിച്ചതെന്നാണ് ആശുപത്രിയെ ഉദ്ധരിച്ചുള്ള ഇന്ത്യ ടുഡേ റിപ്പോര്‍ട്ട്.

അതേസമയം, കൊല്ലപ്പെട്ട പെൺകുട്ടിയുടെ കുടുംബത്തിന് ആന്ധ്രാ പ്രദേശ് മുഖ്യമന്ത്രി ജഗൻമോഹൻ റെഡ്ഡി 10 ലക്ഷം രൂപ ധനസഹായം പ്രഖ്യാപിച്ചു. സ്ത്രീകള്‍ക്കെതിരായ ആക്രമണങ്ങള്‍ ആവര്‍ത്തിക്കുന്നതിൽ പ്രതിഷേധിച്ച് സംസ്ഥാനത്ത് പ്രതിഷേധവും ശക്തിപ്പെട്ടിട്ടുണ്ട്.

Also Read: ഒളിഞ്ഞിരിക്കുന്നത് 17 ലക്ഷത്തോളം വൈറസുകള്‍; പുതുതായി 5 രോഗങ്ങള്‍, ജന്തുക്കളില്‍ നിന്ന് മനുഷ്യരിലേക്ക് അതിവേഗം

പ്രതിയ്ക്കെതിരെ കര്‍ശന നടപടി ഉറപ്പാക്കണമെന്ന് മുഖ്യമന്ത്രി ചീഫ് സെക്രട്ടറിയ്ക്കും ഡിജിപിയ്ക്കും ഇൻ്റലിജൻസ് മേധാവിയ്ക്കും നിര്‍ദേശം നല്‍കിയിട്ടുണ്ട്. ആഭ്യന്തരമന്ത്രി മേകാതോടി സുചാരിത, ദിശ സ്പെഷ്യൽ ഓഫീസര്‍മാരായ കൃതിക ശുക്ല, ദീപിക പാട്ടീൽ എന്നിവരോട് പെൺകുട്ടിയുടെ കുടുംബത്തെ ഉടൻ സന്ദര്‍ശിക്കാൻ മുഖ്യമന്ത്രി നിര്‍ദേശം നല്‍കി. ദിശ മൊബൈൽ ആപ്പ് ഫോണിൽ ഡൗൺലോഡ് ചെയ്തു സൂക്ഷിക്കാനായി ബോധവത്കരണം നടത്തുമെന്നും അദ്ദേഹം അറിയിച്ചു.