ചികിത്സ നിഷേധിച്ചു: അപകടത്തിൽ പരിക്കേറ്റ യുവാവ് മരിച്ചു

കൊല്ലം: ചികിത്സ കിട്ടാഞ്ഞതിനെ തുടർന്ന് ബൈക്ക് അപകടത്തിൽ തലക്ക് പരിക്കേറ്റ യുവാവ് മരിച്ചു.കുരീപ്പുഴ കൊച്ചാനത്തുവീട്ടിൽ അജിത് കൃഷ്ണൻ (28) ആണ് ഇന്ന് രാവിലെ മരിച്ചത്.

കുരീപ്പുഴയിൽ നിന്ന് കൊല്ലത്തേക്ക് വരുമ്പോൾ അജിത് സഞ്ചരിച്ച ബൈക്കിന് പിന്നിൽ മറ്റൊരു ബൈക്ക് വന്നിടിച്ചാണ് അപകടമുണ്ടായത്. അജിത് റോഡിലേക്ക് തലയിടിച്ച് തെറിച്ചു വീണപ്പോൾ കണ്ടു നിന്ന നാട്ടുകാരാണ് സ്വകാര്യ മെഡിക്കൽ കോളജ് ആശുപത്രിയിൽ പ്രവേശിപ്പിച്ചത്.

ഉടൻ പണം അടക്കാൻ കഴിയാഞ്ഞതിനാൽ ആശുപത്രി അധികൃതർ അജിത്തിന് ചികിത്സ നിഷേധിച്ചെന്നാണ് ആരോപണം. സിടി സ്‌കാൻ നടത്താൻ പണം ഇല്ലാതെ അജിത്തിനെ ആശുപത്രിയിൽ എത്തിച്ചവരെ ബന്ധുക്കൾ എത്തുന്നത് വരെ കാത്തു നിന്നു.

പണമടക്കാതെ സിടി സ്‌കാൻ നടത്തില്ലെന്ന് ആശുപത്രി അധികൃതർ അറിയിച്ചിരുന്നു. ഒരു മണിക്കൂറോളം അജിത്തിന് ചികിത്സ ലഭിച്ചില്ല. ബന്ധുക്കളെത്തി അജിത്തിനെ തിരുവനന്തപുരതുള്ള സ്വകാര്യ ആശുപത്രിയിലേക്ക് മാറ്റിയെങ്കിലും ജീവൻ രക്ഷിക്കാനായില്ല.