വിവാഹാഭ്യർഥന നിരസിച്ചു; യുവതിയുടെ കഴുത്തറുത്ത ശേഷം യുവാവ് ആത്മഹത്യയ്‌ക്ക് ശ്രമിച്ചു, ഇരുവരും ചികിത്സയിൽ

വിശാഖപട്ടണം: വിവാഹാഭ്യർഥന നിരസിച്ച യുവതിയെ കഴുത്തറുത്ത ശേഷം യുവാവ് ആത്മഹത്യയ്‌ക്ക് ശ്രമിച്ചു. ആന്ധ്രപ്രദേശിലെ വിശാഖപട്ടണത്താണ് സംഭവം. ഗുരുതരമായി പരിക്കേറ്റ 23കാരിയെ ആശുപത്രിയിൽ പ്രവേശിപ്പിച്ചു. യുവാവിൻ്റെ പരിക്ക് ഗുരുതരമല്ലെന്നാണ് പുറത്തുവരുന്ന വിവരം. സമീപവാസിയായ ശ്രീകാന്താണ് പെൺകുട്ടിയെ ഉപദ്രവിച്ചത്.

Also Read: 12 കാരനെ മദ്രസയിൽ ചങ്ങലയ്ക്കിട്ട് മർദ്ദിച്ചു; നേരിടേണ്ടിവന്നത് ക്രൂരപീഡനം

കഴിഞ്ഞ ബുധനാഴ്‌ച രാവിലെ 8.45 ഓടെയാണ് സംഭവമെന്ന് ടൈംസ് നൗ റിപ്പോർട്ട് ചെയ്‌തു. യുവാവ് പെൺകുട്ടിയോട് പലതവണ വിവാഹാഭ്യർഥന നടത്തിയിരുന്നു. ആറ് മാസം മുൻപ് മാതാപിതാക്കളുമായി ശ്രീകാന്ത് വീട്ടിലെത്തിയെങ്കിലും പെൺകുട്ടിയും കുടുംബവും ബന്ധത്തിന് താൽപ്പര്യമില്ലെന്ന് അറിയിച്ചു.

മാതാപിതാക്കളുടെ തീരുമാനപ്രകാരം വേറെ വിവാഹം ചെയ്യുമെന്ന് പെൺകുട്ടി അറിയിച്ചതോടെ യുവാവ് പ്രകോപിതനായിരുന്നു. സംഭവദിവസം വീട്ടിൽ അതിക്രമിച്ച് കയറിയ ശ്രീകാന്ത് പെൺകുട്ടിയുടെ കഴുത്തറുക്കാൻ ശ്രമിക്കുകയും സ്വയം മുറിവേൽപ്പിക്കുകയും ചെയ്‌തു. ബഹളം കേട്ട് എത്തിയ പെൺകുട്ടിയുടെ വീട്ടുകാരും സമീപവാസികളും ഇരുവരെയും ആശുപത്രിയിൽ എത്തിച്ചു.

Also Read: അച്ഛന് ഡിവോഴ്സ് നൽകുന്നില്ല; പതിനേഴുകാരൻ അമ്മയെ കൊലപ്പെടുത്തി

യുവാവിനെതിരെ കേസെടുത്തതായി പോലീസ് വ്യക്തമാക്കി. കൊലപാതകശ്രമം, മുറിവേൽപ്പിക്കൽ, വീട്ടിൽ അതിക്രമിച്ച് കയറി, സ്‌ത്രീകൾക്കെതിരായ ബലപ്രയോഗവും ആക്രമണവും, ആത്മഹത്യാശ്രമം എന്നീ കുറ്റങ്ങളാണ് യുവാവിനെതിരെ പോലീസ് ചുമത്തിയിരിക്കുന്നത്.