fact check: കൊറോണ തടയാന്‍ ഗോമൂത്രം അമിതമായി കുടിച്ച് യോഗാഗുരു ബാബാ രാംദേവ് ആശുപത്രിയിലെന്ന് വ്യാജപ്രചരണം

കൊറോണ വൈറസ് പ്രതിരോധിക്കുന്നതിന് അമിതമായി ഗോമൂത്രം കുടിച്ച് യോഗാ ഗുരു ബാബാ രാംദേവ് ഡല്‍ഹി എയിംസ് ആശുപത്രിയില്‍ ചികിത്സയിലെന്ന് വ്യാജ പ്രചരണം. റാസാ പത്താന്‍ എന്ന് വ്യക്തിയുടെ ഫെയ്സ്ബുക്ക് പ്രൊഫൈലില്‍ നിന്നുമാണ് ഈ വ്യാജമായ പ്രചരണം വന്നിരിക്കുന്നത്.

Also Read : കൊറോണ വൈറസ് ബാധയ്ക്ക് പരിഹാരമാകും എന്ന് പറയുന്ന 10 നുണപ്രചരണങ്ങളും; യാഥാര്‍ത്ഥ്യങ്ങളും

ആശുപത്രി കിടക്കയില്‍ അവശനായി ഇരിക്കുന്ന രാംദേവിന്റെ ചിത്രവും ഉള്‍പ്പെടുത്തിയാണ് വ്യാജപ്രചരണം. ഒപ്പം നിരവധി ഡോക്ടര്‍മാരും രാംദേവിനൊപ്പമുണ്ട്. 'സല്‍വാര്‍ താരമായ ബാബരാംദേവ് എയിംസില്‍ അഡ്മിറ്റ് ചെയ്തിരിക്കുകയാണ്. കൊറോണ വൈറസ് പ്രതിരോധിക്കുന്നതിന് വേണ്ടി ഗോമൂത്രം കുടിച്ചതാണ് ഇതിന് കാരണമെന്ന് ഡോക്ടര്‍മാര്‍ പറഞ്ഞു.' എന്ന് ഹിന്ദിയില്‍ എഴുതിയ പോസ്റ്റും ചിത്രത്തോടൊപ്പമുണ്ട്. ഇതോടെ നിരവധി പോസ്റ്റുകള്‍ സമാനമായി പ്രചരിച്ചു തുടങ്ങി.

എന്നാല്‍ യാഥാര്‍ത്ഥ്യം ഇങ്ങനെ,

തികച്ചും തെറ്റായ പ്രചരണമാണ് ബാബാ രാംവിനെതിരെ പ്രചരിക്കുന്നത്. 2011ല്‍ കള്ളപ്പണത്തിനെതിരെ രാംദേവ് നടത്തിയ സത്യാഗ്രഹം അവസാനിപ്പിച്ച ശേഷം ആശുപത്രിയില്‍ ആരോഗ്യപരിശോധനയ്ക്ക് വിധേയനാകുന്നതിന്റെ ചിത്രമാണ് ഇപ്പോള്‍ പ്രചരിക്കുന്നത്. ഡല്‍ഹിയിലെ ഡെറാ‍ഡൂണ്‍ ആശുപത്രിയിലാണ് ചികിത്സയ്ക്ക് വിധേയനായത്. ചിത്രത്തെപ്പോലെ കൊറോണയെ പ്രതിരോധിക്കുന്നതിന് വേണ്ടി തന്നെ ഗോമൂത്രം കുടിച്ചുവെന്നതും തെറ്റായ വാർ‍ത്തയാണ്.



കണ്ടെത്തിയ മാര്‍ഗ്ഗം

പ്രചരണത്തിന്റെ അടിസ്ഥാനത്തില്‍ ബാബാ രാംദേവ് അവശന്‍ എന്ന കീവേഡ് ഉപയോഗിച്ച് നടത്തിയ തിരച്ചിലില്‍ 2011ലെ വാര്‍ത്തകള്‍ പുറത്തുവന്നു. കള്ളപ്പണത്തിനെതിരെ ബാബാ രാംദേവ് നടത്തിയ നിരാഹാര സത്യാഗ്രഹം അവസാനിപ്പിച്ചു. എന്ന തലക്കെട്ടുമായി ഇന്ത്യാ ടുഡെ നല്‍കിയ വാര്‍ത്തയും ചിത്രവുമാണ് ആദ്യം വന്നത്. ഈ ചിത്രം പകര്‍ത്തിയത് 2011 ജൂണ്‍ മാസം 12നാണ്.



ഈ സംഭവത്തില്‍ പ്രതിഷേധവുമായി രാംദേവിന്റെ വക്താവ് തിജ്രിവാല എസ്കെയും രംഗത്തുവന്നിരുന്നു. മാര്‍ച്ച് അഞ്ചിനാണ് വിവാദത്തിന് മറുപടി നല്‍കിക്കൊണ്ട് അദ്ദേഹം രംഗത്തുവന്നത്. ഗോമൂത്രം കുടിച്ച് ആശുപത്രിയിലാണെന്നത് തെറ്റായ പ്രചരണമാണെന്നും അദ്ദേഹം പറഞ്ഞു. 'ഇത് വളരെ മോശമായ പ്രവൃത്തിയാണ്. ബഹുമാന്യനായ രാംദേവ് ആരോഗ്യവാനായി ഇരിക്കുന്നു. ഏതാനും ദിവസങ്ങളായി അദ്ദേഹം നിരവധി വാര്‍ത്താ ചാനലുകള്‍ക്ക് അഭിമുഖം നല്‍കി വരികയാണെന്നും ഇന്ന് അദ്ദേഹം ബെംഗളൂരുവിലേക്ക് പോയിരിക്കുകയാണെന്നും' അദ്ദേഹം ട്വിറ്റ് ചെയ്തു. അഭിമുഖം നല്‍കിയ ചാനലുകളുടെ ചിത്രങ്ങള്‍ അടക്കം പങ്കുവച്ചാണ് അദ്ദേഹം ട്വിറ്റ് ചെയ്തിരിക്കുന്നത്.