ഒന്നേകാല്‍ ലക്ഷം കടന്ന് രാജ്യത്തെ കൊവിഡ് കേസുകള്‍; 24 മണിക്കൂറിനിടെ 6654 കേസുകള്‍

ന്യൂഡല്‍ഹി: രാജ്യത്ത് കൊവിഡ് കേസുകള്‍ ഒന്നേകാല്‍ ലക്ഷം കടന്നു. കഴിഞ്ഞ 24 മണിക്കൂറിനിടെ 6654 പേര്‍ക്ക് പുതുതായി കൊവിഡ് സ്ഥിരീകരിച്ചു. പ്രതിദിനമുള്ള രാജ്യത്തെ ഏറ്റവും ഉയര്‍ന്ന കൊവിഡ് കേസാണിത്. ഈ സമയപരിധിയ്ക്കുള്ളില്‍ 137 മരണവും റിപ്പോര്‍ട്ട് ചെയ്തു.

Also Read: രാജ്യത്ത് ഗ്രീന്‍ ജില്ലകള്‍ കുറയുന്നു, നോണ്‍ ഹോട്ട്‌സ്‌പോട്ട് മേഖലകളിലും മൂര്‍ച്ഛിച്ച് രോഗം

വെള്ളിയാഴ്ച പുറത്തുവിട്ട കണക്കുകള്‍ പ്രകാരം 1,18,447 പേര്‍ക്കാണ് കൊവിഡ് സ്ഥിരീകരിച്ചതെങ്കില്‍ ഇന്ന് 1,25,101 പേര്‍ക്കാണ് കൊവിഡ് സ്ഥിരീകരിച്ചത്. അതില്‍ 51,784 പേരാണ് രോഗമുക്തി നേടിയത്. 3720 പേര്‍ മരിക്കുകയും ചെയ്തു.


Also Read: COVID-19 Live: രാജ്യത്ത് രോഗികള്‍ ഒന്നേകാല്‍ ലക്ഷം കടന്നു, ആകെ മരണം 3720

മഹാരാഷ്ട്ര തന്നെയാണ് രോഗികളുടെ എണ്ണത്തിലും മരണനിരക്കിലും മുന്നില്‍. 44,582 പേര്‍ക്കാണ് മഹാരാഷ്ട്രയില്‍ ഇതുവരെ രോഗം സ്ഥിരീകരിച്ചത്. 1517 പേര്‍ മരിച്ചു. മഹാരാഷ്ട്രയ്ക്കു പിന്നാലെ രോഗികളുടെ എണ്ണത്തില്‍ രണ്ടാമതായി തമിഴ്‌നാടാണ് ഉള്ളത്. മരണനിരക്കില്‍ രണ്ടാമത് ഗുജറാത്താണുള്ളത്. 14753 രോഗികളും 98 മരണവുമാണ് തമിഴനാട്ടില്‍ സ്ഥിരീകരിച്ചിരിക്കുന്നത്. ഗുജറാത്തില്‍ 13628 പേര്‍ക്ക് കൊവിഡ് സ്ഥിരീകരിക്കുകയും 802 പേര്‍ മരിക്കുകയും ചെയ്തു.