തൃണമൂൽ, സിപിഎം എംഎൽഎമാർ ബിജെപിയിൽ

കൊൽക്കത്ത: ലോകസഭാ തെരഞ്ഞെടുപ്പിൽ ബംഗാളിൽ ബിജെപി വൻ മുന്നേറ്റം ഉണ്ടാക്കിയതിനു പിന്നാലെ ബിജെപിയിലേക്ക് നേതാക്കളുടെ ഒഴുക്ക്. തൃണമൂൽ കോൺഗ്രസിൽനിന്നും രണ്ട് എംഎൽഎമാരും സിപിഎമ്മിൽനിന്നും ഒരു എംഎൽഎയും ബിജെപി അംഗത്വമെടുത്തു. ഇവർക്കൊപ്പം നിരവധി പ്രദേശിക നേതാക്കളും ബിജെപിയുടെ ഭാഗമായി.തൃണമൂലിൽനിന്നും പുറത്താക്കപ്പെട്ട മുകുൾ റോയുടെ മകൻ സുബ്രൻഷു റോയ്, തുഷാർ കാന്തി ഭട്ടാചാര്യ എന്നിവർ തൃണമൂലിൽനിന്നും സിപിഎമ്മിൽനിന്നും ദേബേന്ദ്ര നാഥ് റോയുമാണ് ബിജെപിയിൽ ചേർന്നത്. തൃണമൂലിന്റെ 52 കൌൺസിലർമാരും ബിജെപിയിൽ ചേർന്നു.

ബിജെപി ആസ്ഥാനത്തുചേർന്ന പരിപാടിയിൽ കൈലാഷ് വിജയ് വർഗിയയും മുകുൾ റോയിയും ചേർന്നാണ് ഇവർക്ക് ബിജെപി അംഗത്വം നൽകിയത്. 2021ൽ ബംഗാളിൽ ബിജെപി സർക്കാർ ഉണ്ടാക്കുമെന്ന് വിജയ് വർഗിയ പറഞ്ഞു. മറ്റ് പാർട്ടികളിലെ എംഎൽഎമാരെ ബിജെപിയിൽ എത്തിക്കുന്ന ഏഴ് ഘട്ടങ്ങളിൽ ആദ്യഘട്ടമാണിതെന്നും അദ്ദേഹം വ്യക്തമാക്കി.