അബു ജിന്‍ഡാല്‍ ഉള്‍പടെ ഏഴുപേര്‍ക്ക് ജീവപര്യന്തം തടവ്

മുംബൈ: മുംബൈ ഭീകരാക്രമണത്തിന്‍റെ സൂത്രധാരനായ അബു ജുന്‍ഡാലിനും ആറു കൂട്ടാളികള്‍ക്കും ജീവപര്യന്തം ശിക്ഷ വിധിച്ചു. ഔറംഗാബാദ് ആയുധക്കടത്ത് കേസുമായി ബന്ധപ്പെട്ട് ചോവ്വാഴ്ച സ്പെഷല്‍ മക്കോക്ക കോടതിയാണ് ശിക്ഷ വിധിച്ചത്. രണ്ട് പ്രതികള്‍ക്ക് 14 വര്‍ഷവും മറ്റു മൂന്ന് പേര്‍ക്ക് എട്ട് വര്‍ഷവും വീതം തടവിന് വിധിച്ചു.

കേസിലെ 12 പ്രതികളും കുറ്റക്കാരാണെന്ന് കോടതി ജൂണ്‍ 28ന് വിധിച്ചിരുന്നു. 2002 ലെ ഗുജറാത്ത് കലാപത്തിന് പ്രതികാരമായി അന്നത്തെ ഗുജറാത്ത് മുഖ്യമന്ത്രിയായിരുന്ന നരേന്ദ്ര മോദിയെയും വിഎച്ച്പി നേതാവ് പ്രവീണ്‍ തൊഗാഡിയയേയും ഇല്ലാതാക്കുക എന്നതായിരുന്നു പ്രതികളുടെ ലക്ഷ്യമെന്ന് കോടതി അന്ന് വ്യക്തമാക്കി. ആകെ 22 പ്രതികള്‍ ഉണ്ടായിരുന്ന കേസില്‍ 12 പേരാണ് കുറ്റക്കാരെന്ന് കോടതി കണ്ടെത്തി. തുടര്‍ന്ന് എട്ട് പേരെ വിട്ടയച്ചു. ഒരാള്‍ നേരത്തെ മാപ്പുസാക്ഷിയായിരുന്നു. മറ്റൊരാള്‍ ഇപ്പോഴും ഒളിവിലാണ്.

2006 മെയ്എട്ടിനാണ് കാറില്‍ സഞ്ചരിക്കുകയായിരുന്ന പ്രതികളെ മഹാരാഷ്ട്ര ഭീകരവിരുദ്ധ സേന പിന്തുടര്‍ന്ന് പിടികൂടിയത്. ഇവരില്‍ നിന്ന് 30 കിലോ ആര്‍ഡിഎക്‌സും 10 എകെ 47 തോക്കുകളും 3,200 ബുള്ളറ്റുകളും പിടിച്ചെടുത്തിരുന്നു.