കൊവിഡ് ചതിച്ച 2020; പ്രധാനമന്ത്രി മോദി ഒരു വിദേശയാത്ര പോലും നടത്താത്ത ആദ്യ വർഷം

ന്യൂഡൽഹി: പ്രധാനമന്ത്രി നരേന്ദ്ര മോദിയുടെ വിദേശ യാത്രകൾ എന്നും വാർത്തകളിൽ ഇടം നേടാറുണ്ട്. 2014ൽ ഇന്ത്യൻ പ്രധാനമന്ത്രിയായി അധികാരമേറ്റതിന് ശേഷം നിരവധി യാത്രകളാണ് അദ്ദേഹം വിദേശത്തേക്ക് നടത്തിയത്. എന്നാൽ കൊവിഡ് മഹാമാരി ലോകത്തെ പിടിച്ചുലച്ച 2020ൽ മോദി ഇതുവരെയും വിദേശ യാത്രകൾ നടത്തിയിട്ടില്ല. പുറത്ത് വരുന്ന റിപ്പോർട്ടുകൾ പ്രകാരം ഈ വർഷം ഇനി മോദിയ്ക്ക് വിദേശ യാത്രകളൊന്നും നിശ്ചയിച്ചിട്ടുമില്ല. അങ്ങിനെ വരികയാണെങ്കിൽ പ്രധാനമന്ത്രി പദത്തിൽ എത്തിയതിന് ശേഷം മോദി വിദേശ യാത്ര നടത്താത്ത ആദ്യ വർഷമെന്ന ഖ്യാതി 2020ന് സ്വന്തമാകും.

പ്രധാനമന്ത്രിയുടെ ഓഫീസ് വെബ്സൈറ്റ് പ്രകാരം, ഈ വർഷം ഇതുവരെ മോദി വിദേശത്തേക്ക് പോയിട്ടില്ല. നവംബർ അവസാനമോ, ഡിസംബറിലോ യാത്ര നിശ്ചയിച്ചിട്ടുമില്ല. ഏറ്റവും അവസാനം അദ്ദേഹം വിദേശത്തേക്ക് പോയത് 2019 നവംബറിലാണ്. ബ്രസീലിലേക്കായിരുന്നു ഈ യാത്ര.

Also Read : കോൺഗ്രസിനെ ശക്തിപ്പെടുത്തുന്നതിൽ പ്രധാന പങ്ക് വഹിച്ചയാൾ; അനുശോചനം രേഖപ്പെടുത്തി പ്രധാനമന്ത്രി

രാജ്യത്ത് കൊവിഡ് കേസുകൾ കുതിച്ചുയർന്നതിന് പിന്നാലെ ഈ വർഷം മാർച്ചിൽ വിദേശ യാത്രകൾ പാടില്ലെന്ന് തന്‍റെ മന്ത്രിസഭയിലെ അംഗങ്ങളോട് മോദി പറഞ്ഞിരുന്നു. അനാവശ്യ യാത്രകൾ ഒഴിവാക്കണമെന്ന നിർദേശത്തോട് കൂടിയായിരുന്നു ഇത്.

അതേസമയം രാജ്യത്തെ വിവിധ സംസ്ഥാനങ്ങൾ ഈ കാലയളവിൽ മോദി സന്ദർശിക്കുകയും ചെയ്തിരുന്നു. ബിഹാർ തെരഞ്ഞെടുപ്പ്, ഉത്തർപ്രദേശിലെ അയോധ്യയിലെ രാമക്ഷേത്രത്തിലെ ചടങ്ങ് തുടങ്ങിയവ ഉൾപ്പെടെയായിരുന്നു ഈ യാത്ര.

Also Read : സ്ഥിരം യാത്രക്കാരനാണോ, ഇനി KSRTC ഓർഡിനറി ബസിൽ സീറ്റ് റിസർവ് ചെയ്യാം!

ഇംഗ്ലീഷ് വാർത്താ മാധ്യമമായ ദി പ്രിന്‍റിന്‍റെ റിപ്പോർട്ട് പ്രകാരം 2014 ജൂൺ 15 മുതൽ 2019 നവംബർ വരെയുള്ള കാലയളവിൽ മോദി 96 രാജ്യങ്ങളാണ് സന്ദർശിച്ചിരിക്കുന്നത്. പ്രധാനമന്ത്രിയുടെ ഓഫീസ് വെബ്സൈറ്റ് അടിസ്ഥാനമാക്കിയാണ് ഈ കണക്കെന്നാണ് റിപ്പോർട്ട്. 2014ൽ മോദി എട്ട് രാജ്യങ്ങളായിരുന്നു സന്ദർശിച്ചിരുന്നത്.

2015ൽ 23 രാജ്യങ്ങളിലേക്കാണ് പ്രധാനമന്ത്രി നരേന്ദ്ര മോദി യാത്ര ചെയ്തത്. 2016- 17, 2017- 14, 2018- 20, 2019- 14 എന്നിങ്ങനെയാണ് പിന്നീടുള്ള നാല് വർഷങ്ങളിലെ യാത്ര. കൊവിഡ് കാരണമാണെങ്കിലും പ്രധാനമന്ത്രിയായിരിക്കെ മോദി വിദേശ യാത്രകൾ നടത്താത്ത ആദ്യ വർഷമെന്ന ഖ്യാതിയാണ് 2020നെ തേടിയെത്തുന്നത്.