ഹൈദരാബാദ്: നഗരത്തിലെ റെസിഡൻഷ്യൽ അപാര്‍ട്ട്‌മെന്‍റിൽ 25 പേർക്ക് കൊവിഡ്-19 സ്ഥിരീകരിച്ചു. ലോക്ക് ഡൗണിനിടെ പിറന്നാൾ ആഘോഷം നടന്ന സ്ഥലത്താണ് ഇത്രയേറെ കൊവിഡ് കേസുകൾ സ്ഥിരീകരിച്ചിരിക്കുന്നത്. ഹൈദരബാദ് സിറ്റിയ്ക്ക് സമീപത്തെ മദനപേട്ടിലാണ് സംഭവമെന്ന് ഗ്രേറ്റർ ഹൈദരാബാദ് മുനിസിപ്പൽ കോർപ്പറേഷനിലെ സോണൽ കമ്മീഷണർ അശോക് സാമ്രാട്ട് പറഞ്ഞു.
'ഹൈദരബാദ് ഓൾഡ് സിറ്റിക്ക് സമീപത്തെ മദനപേട്ടിലെ ഒരു അപാര്ട്ട്മെന്റിലെ 25 പേർക്ക് കൊവിഡ് സ്ഥിരീകരിച്ചിട്ടുണ്ട്. ഇവരെയെല്ലാവരെയും ആശുപത്രിയിൽ പ്രവേശിപ്പിച്ചു. ഇവരുടെ സമ്പർക്ക പട്ടിക തയ്യാറാക്കി വരികയാണ്.' അശോക് സാമ്രാട്ട് പറഞ്ഞു.
Also Read: കൊവിഡ്-19; മഹാരാഷ്ട്രയില്‍ ലോക്ക് ഡൗണ്‍ മെയ് 31 വരെ നീട്ടി
'അപാര്ട്ട്മെന്റിലെ ഒരാള്‍ കൊവിഡ് രോഗിയുമായി സമ്പര്‍ക്കം പുലര്‍ത്തിയിരുന്നു. അതിനു ശേഷം പിറന്നാളാഘോഷവും അപാര്‍ട്ട്‌മെന്റില്‍ നടത്തിയിരുന്നു. ഇതില്‍ കുറച്ചുപേർ പങ്കെടുക്കുകയും ചെയ്തിട്ടുണ്ട്. എന്നാല്‍ പിറന്നാളാഘോഷ പരിപാടിയിലാണ് രോഗം വ്യാപിച്ചതെന്നത് സ്ഥിരീകരിച്ചിട്ടില്ല', സാമ്രാട്ട് പറഞ്ഞു.
കേന്ദ്ര ആരോഗ്യ മന്ത്രാലയത്തിന്‍റെ കണക്കുകൾ പ്രകാരം തെലങ്കാനയിൽ ഇതുവരെ 1454 പേർക്കാണ് കൊവിഡ്-19 സ്ഥിരീകരിച്ചിരിക്കുന്നത്. ഇതിൽ 959 പേരുടെ രോഗം ഭേദമായപ്പോൾ 34 മരണങ്ങളും റിപ്പോർട്ട് ചെയ്തിട്ടുണ്ട്.