3 നിയമസഭാ തെരഞ്ഞെടുപ്പുകളിൽ കോൺഗ്രസ് തിരിച്ചുവരുമെന്ന് സര്‍വേ

ന്യൂഡൽഹി: ഈ വര്‍ഷം നവംബറിലും ഡിസംബറിലും നടക്കാനിരിക്കുന്ന അഞ്ചിൽ മൂന്ന് നിയമസഭകളിലു കോൺഗ്രസ് വിജയിക്കുമെന്ന് സര്‍വ്വേ ഫലം. മധ്യപ്രദേശ്, രാജസ്ഥാൻ, ഛത്തീസ്‍‍ഗഡ് എന്നീ സംസ്ഥാനങ്ങളിൽ കോൺഗ്രസ് അധികാരത്തിലെത്തുമെന്ന് എബിപി നടത്തിയ അഭിപ്രായ സര്‍വേയിൽ പറയുന്നു.രാജസ്ഥാനിൽ ബിജെപിയെ കോൺഗ്രസ് തൂത്തെറിയുമെന്നാണ് സര്‍വേ ഫലം.

രാജസ്ഥാനിൽ 200 അംഗ സഭയിൽ കോൺഗ്രസ് 142 സീറ്റുകള്‍ വരെ നേടിയേക്കും. 56 സീറ്റുകള്‍ മാത്രമാണ് ബിജെപിയ്ക്ക് ലഭിക്കുക.കഴിഞ്ഞ തവണ സംസ്ഥാനത്ത് 163 സീറ്റുകള്‍ വരെ നേടിയാണ് അധികാരത്തിലേറിയത്, കോൺഗ്രസിന് കിട്ടിയതാകട്ടെ, 21 സീറ്റും.

അതേസമയം, മധ്യപ്രദേശിലും കേവല ഭൂരിപക്ഷത്തോടെ 15 വര്‍ഷത്തിനു ശേഷം കോൺഗ്രസ് അധികാരം തിരിച്ചു പിടിക്കുമെന്നാണ് സര്‍വേഫലം. മൊത്തം 230 സീറ്റുകളിൽ 122 എണ്ണവും കോൺഗ്രസ് നേടുമെന്നും ബിജെപി വിജയം 108 സീറ്റുകളിൽ ഒതുങ്ങുമെന്നുമാണ് സര്‍വേ ഫലം. അതേസമയം, ബിജെപിയും കോൺഗ്രസും തമ്മിൽ 0.7 ശതമാനത്തിന്‍റെ വോട്ട് വ്യത്യാസം മാത്രമാണ് പറയുന്നത്.

സര്‍വ്വേ ഫലം അനുസരിച്ച് 15 വര്‍ഷത്തിന് ശേഷം ഛത്തീസ്‍ഗഡിലും കോൺഗ്രസ് അധികാരത്തിൽ തിരിച്ചെത്ും. 90 അംഗ നിയമസഭയിൽ 47 സീറ്റുകള്‍ കോൺഗ്രസിന് ലഭിക്കുമെന്നാണ് ഫലം. ഭരണകക്ഷിയായ ബിജെപിയ്ക്ക് 40 സീറ്റുകള്‍ മാത്രമാണ് ലഭിക്കുക. അതേസമയം, ഏഴ് സീറ്റുകളുടെ അന്തരമാണ് സര്‍വേഫലം പ്രവചിക്കുന്നതെങ്കിലും 0.3 ശതമാനത്തിന്‍റെ വോട്ട് വ്യത്യാസം മാത്രമാണ് ഇരുപാര്‍ട്ടികളും തമ്മിലുള്ളത്.