78 കേന്ദ്രമന്ത്രിമാരിൽ 72-ഉും കോടീശ്വരൻമാർ

ന്യൂഡൽഹി: മോദി മന്ത്രിസഭയിലെ 78 കേന്ദ്രമന്ത്രിമാരിൽ 72 പേരും കോടീശ്വരൻമാർ. നാമനിർദ്ദേശ പത്രികക്കൊപ്പം നൽകിയ സത്യവാങ്മൂലത്തിന്‍റെ അടിസ്ഥാനത്തിൽ അസോസിയേഷന്‍ ഓഫ് ഡെമോക്രാറ്റിക് റിഫോംസാണ് സ്വത്ത്വിവര കണക്കുകള്‍ പുറത്ത് വിട്ടത്.

കേന്ദ്രമന്ത്രിമാരിൽ 30 ശതമാനം പേരും ക്രിമിനൽ കേസുകള്‍ നേരിടുന്നവരാണ്. 24 മന്ത്രിമാർക്കെതിരെയാണ് കേസുകള്‍ ഉള്ളത്. ഇതിൽ 14 പേർ ബലാത്സംഗം,കൊലപാതകശ്രമം,തിരഞ്ഞെടുപ്പ് ചട്ടലംഘനം അടക്കമുള്ള ഗൗരവമായ ക്രിമിനല്‍ കേസുകളുള്ളവരാണ്.

പുതിയ മന്ത്രിമാരിൽ ഏറ്റവും കൂടുതൽ ആസ്തിയുള്ളത് എം.ജെ. അക്ബറിനാണ്. 44.90 കോടിയാണ് അദ്ദേഹത്തിന്‍റെ ആസ്തി. ഏറ്റവും കുറവ് ആസ്തിയുള്ളത് അനിൽ മാധവ് ദാവെക്കാണ്. 60.97 ലക്ഷം രൂപയാണ് ദാവെയുടെ ആസ്തി. പുതുതായി മന്ത്രിസഭയിലെത്തിയവരുടെ ശരാശരി ആസ്തി 8.73 കോടി രൂപയാണ്.

അരുണ്‍ ജെയ്റ്റ്‌ലി, ഹര്‍സിമ്രത് ബാദല്‍, പീയുഷ് ഗോയല്‍ എന്നിലരാണ് സ്വത്തിന്‍റെ കാര്യത്തിൽ ഏറ്റവും മുന്നിൽ.