ഗോരഖ്‌പൂരിൽ 48 മണിക്കൂറിനിടെ 42 ശിശുമരണം

ഗോരഖ്‌പൂർ:രജ്യത്തെ നടുക്കി ശിശുമരണങ്ങൾ ഉത്തര്‍പ്രദേശിൽ തുടർക്കഥയാകുന്നു. രണ്ടുദിവസത്തിനുളളില്‍ 42 കുഞ്ഞുങ്ങളാണ് ബിആര്‍ഡി മെഡിക്കല്‍ കോളജില്‍ മരിച്ചത്. കഴിഞ്ഞ മൂന്നുദിവസം കൊണ്ട് മരണമടഞ്ഞ കുട്ടികളുടെ എണ്ണം അറുപതില്‍ അധികമാണ്. ഇതില്‍ പതിനൊന്ന് കുട്ടികള്‍ മരണമടഞ്ഞത് ജപ്പാന്‍ ജ്വരം മൂലമാണെന്നും ബാക്കിയുളളവര്‍ ന്യൂമോണിയയും നവജാത ശിശുക്കള്‍ക്കുണ്ടാകുന്ന മറ്റ് രോഗങ്ങള്‍ മൂലമാണെന്നും ബിആര്‍ഡി മെഡിക്കല്‍ കോളജ് പ്രിന്‍സിപ്പല്‍ പി.കെ സിങ് പറഞ്ഞു.

കനത്ത മഴയും വെള്ളപ്പൊക്കവും മലിനീകരണവും രക്ഷകർത്താക്കളെ ആശങ്കയിലാഴ്ത്തുന്നു. നവജാത ശിശുക്കളുടെ തീവ്രപരിചരണ വിഭാഗത്തില്‍ 25 കുട്ടികളാണ് മരണമടഞ്ഞത്. കനത്തമഴയും വെളളപ്പൊക്കവും തുടരുന്ന സാഹചര്യത്തില്‍ വരുംദിവസങ്ങളില്‍ കൂടുതല്‍ മരണങ്ങള്‍ ഉണ്ടായേക്കാമെന്ന ആശങ്കയും ഡോക്ടര്‍മാര്‍ പങ്കുവെക്കുന്നു. ഈ മാസം ആദ്യം ബിആര്‍ഡി മെഡിക്കല്‍ കോളജില്‍ ഓക്‌സിജന്‍ വിതരണം തടസപ്പെട്ടതിനെ തുടര്‍ന്ന് എഴുപതില്‍ അധികം കുട്ടികള്‍ മരിച്ചിരുന്നു. ഇതുമായി ബന്ധപ്പെട്ട് മുന്‍ പ്രിന്‍സിപ്പല്‍ രാജീവ് മിശ്രയെ സ്‌പെഷ്യല്‍ ടാസ്‌ക് ഫോഴ്‌സ് കസ്റ്റഡിയില്‍ എടുത്തിരുന്നു.

42 infants died in 48 hours in Gorakhpur

Infant deaths become a series in Gorakhpur: 42 kids died in last 48 hours