60 സെക്കന്‍റിനുള്ളില്‍ 6 ഇഡ്ഡലി കഴിച്ച് 60കാരി; വീഡിയോ വൈറല്‍

മൈസൂരു: അറുപത് സെക്കന്റിനുള്ളില്‍ ആറ് ഇഡ്ഡലി കഴിച്ച് അറുപതുകാരി. ഒക്ടോബര്‍ 1 ന് മൈസൂരുവില്‍ വച്ച് നടന്ന ഇഡ്ഡലി കഴിക്കല്‍ മത്സരത്തിനിടയിലാണ് രസകരമായ ഈ സംഭവം. മൈസൂരു ദസരയെന്ന ഉത്സവാഘോഷത്തിനോട് അനുബന്ധിച്ചാണ് മത്സരം സംഘടിപ്പിച്ചത്. ഇതിനോടകം തന്നെ വീഡിയോയും വൈറലായിട്ടുണ്ട്.

ഇഡ്ഡലി കഴിക്കല്‍ മത്സരത്തില്‍ ഒന്നാം സ്ഥാനം നേടിയത് ഹുല്ലാഹള്ളി സ്വദേശിയായ സരോജാമ്മയാണ്. സ്ത്രീകള്‍ക്കു വേണ്ടി പ്രത്യേകമായാണ് ഇഡ്ഡലി കഴിക്കല്‍ മത്സരം ഒരുക്കുന്നത്. ഒരു മിനിറ്റിനുള്ളില്‍ ഏറ്റവും കൂടുതല്‍ ഇഡ്ഡലി കഴിക്കുന്നയാളെ ആണ് വിജയിയായി പ്രഖ്യാപിക്കുക. എന്നാല്‍, സരോജാമ്മയ്ക്ക് ഇതൊരു വലിയൊരു കാര്യമല്ലായിരുന്നു. സരോജാമ്മ അനായാസമായി ഇഡ്ഡലി കഴിക്കുന്നതായി വീഡിയോയില്‍ കാണാം.

കര്‍ണാടകയിലെ ഔദ്യോഗിക ആഘോഷമാണ് മൈസൂരു ദസരയെന്ന പത്തു ദിവസം നീണ്ടു നില്‍ക്കുന്ന ഈ പരിപാടി. നവരാത്രിയില്‍ ആരംഭിക്കുന്ന ഈ ആഘോഷം വിജയദശമിയില്‍ ആണ് അവസാനിക്കുന്നത്. ഈ സമയത്ത് മൈസൂരു മുഴുവന്‍ പ്രകാശപൂരിതമായിരിക്കും. മാത്രമല്ല, അപ്പോള്‍ മൈസൂരു പാലസ് കാണാന്‍ നല്ല ഭംഗിയായിരിക്കും.