600 കോടിരൂപ അഡ്വാന്‍സ്‍; കൂടുതല്‍ തുക കേന്ദ്രം തരും: ഗവര്‍ണര്‍

കൊച്ചി: പ്രളയദുരിതത്തില്‍ നിന്ന് കരകയറാന്‍ കേന്ദ്ര സര്‍ക്കാര്‍ കേരളത്തിന് അനുവദിച്ച 600 കോടി രൂപ സഹായത്തിന്‍റെ അഡ്വാന്‍സ് മാത്രമാണെന്ന് ഗവര്‍ണര്‍ പി. സദാശിവം. ന്യൂഡല്‍ഹിയില്‍ പ്രധാനമന്ത്രിയുമായി നടത്തിയ കൂടിക്കാഴ്‍ച്ചയ്ക്ക് ശേഷമാണ് സോഷ്യല്‍ മീഡിയയിലൂടെ കേരള ഗവര്‍ണര്‍ ഇക്കാര്യം അറിയിച്ചത്.

"ദേശീയ ദുരന്ത പ്രതികരണനിധിയുടെ മാനദണ്ഡം അനുസരിച്ച് അധിക ധനസഹായം നല്‍കും. പ്രധാനമന്ത്രിയും കേന്ദ്ര ആഭ്യന്തരമന്ത്രിയും ഉറപ്പുനല്‍കി" പി. സദാശിവം ട്വീറ്റ് ചെയ്‍തു.

സംസ്ഥാനത്തെ രക്ഷാ,പുനരധിവാസപ്രവര്‍ത്തനങ്ങളെയും പറ്റി ചര്‍ച്ച നടത്തിയതായി ഗവര്‍ണര്‍ അറിയിച്ചു. കേന്ദ്രം ‍ യാതൊരു മടിയും കൂടാതെ സമയോചിതമായി തന്നെയാണ് സഹായം നല്‍കിയിട്ടുള്ളതെന്ന് പ്രധാനമന്ത്രി പറഞ്ഞതായും അദ്ദേഹം ട്വീറ്റ് ചെയ്‍തു.


പ്രധാനമന്ത്രിയുടെ നിര്‍ദേശപ്രകാരം ദേശീയ ദുരന്തനിവാരണ മാനേജ്‍മെന്‍റ് കമ്മിറ്റി യോഗം ചേര്‍ന്നാണ് 40 കോപ്റ്റര്‍ 31വിമാനം,182 രക്ഷാടീം, 18 സൈനിക മെഡി: ടീം 58 എന്‍ഡിആര്‍എഫ് ടീം,ഏഴു കമ്പനി കേന്ദ്ര സേന നേവി ,കോസ്റ്റ് ഗാര്‍ഡ് 500 ബോട്ടുകള്‍ എന്നിവ രക്ഷാപ്രവര്‍ത്തനം നടത്തിയതെന്നും മറ്റൊരു ട്വീറ്റില്‍ ഗവര്‍ണര്‍ കുറിച്ചു.