ആറാം വയസ്സില്‍ വിവാഹിത; മോചനം വേണമെന്ന് കോടതിയില്‍

രാജസ്ഥാൻ: രാജസ്ഥാനിൽ ബാലവിവാഹത്തിന്‍റെ ഇര വിവാഹമോചനത്തിനായി കോടതിയിൽ. ആറാം വയസ്സിൽ വിവാഹിതയായ പിന്‍റു ദേവിയാണ് പതിനെട്ടാം വയസ്സിൽ വിവാഹമോചനം ആവശ്യപ്പെട്ട് ജോധ്‍പൂർ കോടതിയെ സമീപിച്ചിരിക്കുന്നത്. തന്റേത് ബാല വിവാഹമാണെന്നും ഭർത്താവിനൊത്ത് ജീവിക്കാൻ ആഗ്രഹമില്ലെന്നും പെൺകുട്ടി കോടതിയിൽ പറഞ്ഞു. വീട്ടുകാരുടെ നിര്‍ബന്ധത്തിന് വഴങ്ങി പിന്‍റു ദേവിക്ക് തന്റെ 6-ാം വയസില്‍ വിവാഹം കഴിക്കേണ്ടി വരികയായിരുന്നു.

2006 ലായിരുന്നു പിന്റു ദേവിയുടെ വിവാഹം നടന്നത്.നീണ്ട പന്ത്രണ്ടു വർഷത്തെ ദുരിത ജീവിതത്തിനൊടുവിൽ പെൺകുട്ടി ഒടുവിൽ പെൺകുട്ടി വിവാഹ മോചനം ആവശ്യപ്പെട്ട് കോടതിയെ സമീപിക്കുകയായിരുന്നു. നടന്നത് ബാലവിവാഹം മാത്രമാണെന്നാണ് പെണ്‍കുട്ടിയുടെ പ്രധാന വാദം.

ഭര്‍തൃവീട്ടില്‍ നിന്ന് പെണ്‍കുട്ടി നിരന്തര പീഡനങ്ങള്‍ക്കും ഭീഷണികള്‍ക്കും ഇരയായിരുന്നു. ഒരു എന്‍ജിഒയുടെ സഹായത്തോടെയാണ് പെണ്‍കുട്ടി കോടതിയെ സമീപിച്ചത്. ഭര്‍ത്താവിന്റെ വീട്ടുകാര്‍ ക്രിമിനല്‍ ചുറ്റുപാടുള്ളവരാണെന്നതും കോടതി നിരീക്ഷിച്ചു. ഇവര്‍ക്ക് കോടതി നോട്ടീസ് അയച്ചിരിക്കുകയാണ്.