ആധാര്‍ ലിങ്ക് ചെയ്യുന്നത് ഏറ്റവും അപകടകരം: സൈബര്‍ വിദഗ്ധൻ

നാഗ്പൂര്‍: ആധാര്‍ വിവരങ്ങള്‍ സുരക്ഷിതമാക്കാന്‍ സര്‍ക്കാറിന്റെ ഭാഗത്തുനിന്നും വലിയ നടപടികളൊന്നുമുണ്ടായിട്ടില്ലെന്ന് സൈബര്‍ നിയമ, ഫോറന്‍സിക് വിദഗ്ധര്‍. പാനുമായും മറ്റും ആധാര്‍ ലിങ്ക് ചെയ്യണമെന്ന സര്‍ക്കാര്‍ നിബന്ധന വളരെ അപകടകരമാണെന്നും സൈബര്‍ സുരക്ഷാ സ്ഥാപനമായ പ്രിവോയന്‍സ് സൈബര്‍ ഫോറന്‍സിക്‌സിന്റെ സ്ഥാപക പങ്കാളി സൗരഭ് അത്താവാലെ മുന്നറിയിപ്പു നല്‍കുന്നു.

‘പാനുമായും മറ്റു കാര്യങ്ങളുമായും ആധാര്‍ ലിങ്ക് ചെയ്യണമെന്ന സര്‍ക്കാര്‍ നിര്‍ബന്ധം ഏറ്റവും അപകടകരമാണ്. സൈബര്‍ രംഗത്ത് അടിസ്ഥാന സൗകര്യങ്ങളുടെ അഭാവം വലിയതോതിലുണ്ട്. ഈ പ്രശ്‌നം ഇതുവരെ പരിഹരിച്ചിട്ടില്ല.’ അദ്ദേഹം വ്യക്തമാക്കി. ആധാര്‍ സമ്പ്രദാനം തന്നെ സുരക്ഷിതമല്ലെന്നിരിക്കെ ആധാറുമായി എല്ലാം ലിങ്ക് ചെയ്യുന്നത് വളരെ അപകടകരമെന്നാണ് അദ്ദേഹം പറയുന്നത്. ‘എല്ലാ കാര്യങ്ങളും ആധാറുമായി ലിങ്ക് ചെയ്യുന്നത് തിയറിയില്‍ നല്ലതാണെന്ന് തോന്നും. പക്ഷേ അത് വളരെ അപകടകരമാണ്. കാരണം ആധാര്‍ തന്നെ സുരക്ഷിതമല്ല.’ അദ്ദേഹം പറയുന്നു.