ആധാര്‍ മറ്റു രാജ്യങ്ങളിലേയ്ക്കും വ്യാപിപ്പിക്കണമെന്ന് ബിൽ ഗേറ്റ്സ്

വാഷിങ്ടൺ: ഇന്ത്യ നടപ്പാക്കുന്ന ആധാര്‍ സംവിധാനത്തിന് സാങ്കേതികപ്രശ്നങ്ങളൊന്നുമില്ലെന്നും പദ്ധതി മറ്റു രാജ്യങ്ങളിലേയ്ക്ക് വ്യാപിപ്പിക്കണമെന്നും മൈക്രോസോഫ്റ്റ് സ്ഥാപകൻ ബിൽ ഗേറ്റ്സ്. പദ്ധതി മറ്റുരാജ്യങ്ങളിലേയ്ക്ക് വ്യാപിപ്പിക്കാനുള്ള ശ്രമങ്ങള്‍ ബിൽ ആന്‍റ് മെലിൻഡ ഗേറ്റ്സ് ഫൗണ്ടേഷൻ ആരംഭിച്ചു കഴിഞ്ഞതായും അദ്ദേഹം പറഞ്ഞു.

ലോകബാങ്കിന്‍റെ സഹായത്തോടെ ആധാര്‍ മാതൃക ലോകമെങ്ങും വ്യാപിപ്പിക്കണമെന്നാണ് ബിൽ ഗേറ്റ്സിന്‍രെ നിര്‍ദേശം. ആധാറിന്‍റെ ചുമതലയുള്ള യുണീക് ഐഡന്‍റിഫിക്കേഷൻ അതോരിറ്റി ഓഫ് ഇന്ത്യയുടെ പ്രഥമ ചെയര്‍മാനും ഇൻഫോസിസ് സഹസ്ഥാപകനുമായ നന്ദൻ നിലേക്കനിയാണ് ഈ പദ്ധതിയ്ക്കു വേണ്ടി ലോകബാങ്കിനെ സഹായിക്കുന്നതെന്നും ബിൽ ഗേറ്റ്സ് പറഞ്ഞു.

മറ്റ് രാജ്യങ്ങളിലേക്ക് വ്യാപിപ്പിക്കാന്‍ മാത്രം മൂല്യമുള്ളതാണോ ഇന്ത്യയുടെ സാങ്കേതികവിദ്യയെന്ന ചോദ്യത്തിന് അതെ എന്നായിരുന്നു ബില്‍ ഗേറ്റ്‌സിന്റെ മറുപടി. ആധാറിന്‍റെ നേട്ടങ്ങള്‍ വളരെ വലുതാണെന്നും അദ്ദേഹം കൂട്ടിച്ചേര്‍ത്തു. ആധാറിന്‍റെ സ്വകാര്യതയെപ്പറ്റി ചോദിച്ചപ്പോള്‍ ആധാറിന് യാതൊരു സാങ്കേതികപ്രശ്നങ്ങളുമില്ലെന്നായിരുന്നു അദ്ദേഹത്തിന്‍റെ മറുപടി.

രാജ്യങ്ങളുടെ വേഗത്തിലുള്ള വികസനത്തിനും ജനങ്ങളുടെ ശാക്തീകരണത്തിനും ഗുണമേന്മയുള്ള ഭരണനിര്‍വഹണത്തിനും ആധാര്‍ സഹായകമാണെന്ന് ബിൽ ഗേറ്റ്സ് പറഞ്ഞു.