'സഞ്ജു' നിര്‍മ്മാതാക്കള്‍ക്കെതിരെ അപകീര്‍ത്തിക്കേസുമായി അബു സലിം

മുംബൈ: ബോളിവുഡ് നടന്‍ സഞ്ജയ്‌ ദത്തിന്‍റെ ജീവിതം പറഞ്ഞ 'സഞ്ജു' സിനിമയുടെ നിര്‍മ്മാതാക്കള്‍ക്കെതിരെ കോടതി നോട്ടീസയച്ച് അധോലോക നായകന്‍ അബു സലിം. തന്നെക്കുറിച്ച് ചിത്രത്തില്‍ തെറ്റായ വിവരങ്ങള്‍ നല്‍കിയെന്നാരോപിച്ചാണ് നീക്കം. തന്നെക്കുറിച്ച് പരാമര്‍ശമുള്ള സീനുകള്‍ ചിത്രത്തില്‍ നിന്നും നീക്കം ചെയ്യണമെന്ന് ആവശ്യപ്പെട്ടുകൊണ്ട് രാജ്കുമാര്‍ ഹിരാനി, വിധു വിനോദ് ചോപ്ര, സിനിമയുടെ വിതരണക്കാര്‍, നിര്‍മ്മാണ കമ്പനികള്‍ എന്നിവര്‍ക്ക് അബുസലിം നോട്ടീസയച്ചു.

സിനിമയില്‍ ആയുധവിതരണത്തെക്കുറിച്ച് സഞ്ജയ്‌ ദത്തിന്‍റെ വേഷം അവതരിപ്പിച്ച രണ്‍ബീര്‍ കപൂര്‍ പരാമര്‍ശിക്കുന്ന ഒരു ഭാഗമുണ്ട്. ഇതില്‍ തന്‍റെ ക്ലയന്റിനെക്കുറിച്ച് മോശം പരാമര്‍ശമുണ്ട്. എന്നാല്‍ തന്‍റെ ക്ലയന്റ് ആയുധവിതരണം നടത്തിയിട്ടില്ല. സിനിമയില്‍ ഈ പരാമര്‍ശം വരുന്ന ഭാഗം നീക്കണം എന്നാണ് അബു സലിം പറയുന്നത്. ഇതിനായി പതിനഞ്ചു ദിവസത്തെ സമയമാണ് അബു സലിം ബന്ധപ്പെട്ടവര്‍ക്ക് നല്‍കിയിരിക്കുന്നത്. താന്‍ ഇതുവരെ സഞ്ജയ്‌ ദത്തിനെ നേരിട്ടു കണ്ടിട്ടില്ലെന്നും അബു സലിം വ്യകതമാക്കി.

1993ലെ മുംബൈ സ്‌ഫോടനകേസില്‍ കുറ്റക്കാരനെന്ന് തെളിഞ്ഞതിനെ തുടര്‍ന്ന് ജീവപര്യന്തം ശിക്ഷ അനുഭവിക്കുകയാണ് അബു സലിം ഇപ്പോള്‍.