ആകാശത്ത് വെച്ച് വിമാനത്തിൻ്റെ എൻജിൻ ഓഫായി; അപകടം ഒഴിവായി

ന്യൂഡൽഹി: ആകാശത്ത് വെച്ച് എൻജിന്‍റെ പ്രവര്‍ത്തനം നിലച്ചതിനെത്തുടര്‍ന്ന് ഗോ എയര്‍ വിമാനം ബെംഗലൂരുവിൽ അടിയമന്തരമായി ഇറക്കി. ബെംഗലൂരുവിൽ നിന്ന് പറന്നുയര്‍ന്ന് പത്തുമിനിട്ടുകള്‍ക്കുള്ളിൽ എൻജിന്‍റെ പ്രവര്‍ത്തനം നിലയ്ക്കുകയായിരുന്നു.

ബെംഗലൂരുവിൽ നിന്ന് പൂനെയിലേയ്ക്ക് പുറപ്പെട്ട് ജി8- 283 വിമാനമാണ് അപകടത്തിൽ നിന്ന് രക്ഷപെട്ടത്. ശനിയാഴ്ചയാണ് സംഭവമുണ്ടായത്. സാങ്കേതികത്തകരാറുണ്ടെന്ന് പൈലറ്റിന് സൂചന ലഭിച്ച ഉടൻ തന്നെ വിമാനത്തിന്‍റെ ഒന്നാമത്തെ എൻജിൻ പ്രവര്‍ത്തനരഹിതമാകുകയായിരുന്നു.

യാത്രക്കാരെല്ലാം സുരക്ഷിതരാണെന്നും യാത്രക്കാരെ മറ്റു വിമാനങ്ങളിൽ പൂനെയിലേയ്ക്ക് അയച്ചെന്നും ഗോ എയര്‍ അധികൃതര്‍ അറിയിച്ചു.