രാജ്യത്ത് ആക്ടീവ് കേസുകൾ 10 ശതമാനത്തിൽ താഴെയായി; രോഗമുക്തി നിരക്ക് 90 ശതമാനത്തിലേക്ക്

ന്യൂഡല്‍ഹി: രാജ്യത്ത് ആക്ടീവ് കൊവിഡ് കേസുകൾ കുറഞ്ഞതായി കേന്ദ്ര സർക്കാർ. കഴിഞ്ഞ മൂന്ന് ദിവസത്തിനിടെ ആക്ടീവ് കൊവിഡ് കേസുകൾ ആകെ കൊവിഡ് ബാധിതരുടെ പത്ത് ശതമാനത്തിൽ താഴെയായാണ് കുറഞ്ഞത്. പോസിറ്റീവിറ്റി നിരക്ക് അഞ്ച് ശതമാനത്തിൽ താഴെയാണെന്നും കേന്ദ്ര ആരോഗ്യ മന്ത്രാലയം വ്യക്തമാക്കി.

രാജ്യത്ത് ഇതുവരെ 77,06,946 പേർക്കാണ് കോവിഡ് സ്ഥിരീകരിച്ചത്. ഇതിൽ 9.29 ശതമാനം ആക്ടീവ് കേസുകൾ മാത്രമാണ് നിലവിലുള്ളതെന്നാണ് റിപ്പോർട്ട്. ഇന്ന് രാവിലെ കേന്ദ്ര ആരോഗ്യ മന്ത്രാലയം പുറത്തുവിട്ട കണക്കുകൾ പ്രകാരം ആക്ടീവ് കേസുകളുടെ എണ്ണം 7,15,812 ആണ്. ഇത് പ്രതിദിനം കുറഞ്ഞുവരികയും ചെയ്യുന്നുണ്ട്.

Also Read : ബിഹാര്‍ ഉപമുഖ്യമന്ത്രി സുശീല്‍ കുമാര്‍ മോദിക്ക് കൊവിഡ്-19 സ്ഥിരീകരിച്ചു

കഴിഞ്ഞ മൂന്ന് ദിവസത്തിനിടെ പോസിറ്റീവിറ്റി നിരക്ക് അഞ്ചുശതമാനത്തില്‍ താഴെയാണെന്നതും ആശ്വാസമേകുന്ന വാർത്തയാണ്. പോസിറ്റീവിറ്റി നിരക്ക് കുറയ്ക്കാൻ കഴിഞ്ഞത് വിവിധ സർക്കാരുകളുടെ മികച്ച പ്രവർത്തനത്തിന്‍റെ ഫലമായാണെന്നാണ് സർക്കാർ പറയുന്നത്. ഇന്നത്തെ പോസിറ്റീവിറ്റി നിരക്ക് 3.8 ശതമാനമാണ്.

കൊവിഡ് മുക്തി നേടുന്നവരുടെ എണ്ണത്തിലും വർധനവ് ഉണ്ടായിട്ടുണ്ട് എന്നതും പ്രതീക്ഷയേകുന്ന വാർത്തയാണ്. കഴിഞ്ഞദിവസം 79,415 പേരാണ് രോഗം ഭേദമായി ആശുപത്രി വിട്ടത്. ഇതോടെ രോഗമുക്തി നേടിയവരുടെ ആകെ എണ്ണം 68,74,518 ആയി ഉയർന്നിട്ടുമുണ്ട്. ഇതോടെ രോഗമുക്തി നിരക്ക് 89.20 ശതമാനത്തിൽ എത്തിയിരിക്കുകയാണ്.

Also Read : രാജ്യത്തെ കൊവിഡ് കേസുകൾ 77 ലക്ഷം കടന്നു; 24 മണിക്കൂറിനിടെ 55,000ത്തിലധികം കേസുകൾ

കഴിഞ്ഞ 24 മണിക്കൂറിനിടെ സ്ഥിരീകരിച്ച 702 മരണങ്ങളിൽ 82 ശതമാനവും പത്ത് സംസ്ഥാനങ്ങളിലും കേന്ദ്രഭരണപ്രദേശങ്ങളിലുമായാണ് രേഖപ്പെടുത്തിയിരിക്കുന്നത്. ഇതിൽ 25 ശതമനാത്തിലധികവും മഹാരാഷ്ട്രയിലാണ്, 180 മരണങ്ങൾ.