നടി പായല്‍ ചക്രവര്‍ത്തി മരിച്ച നിലയില്‍

കൊല്‍ക്കത്ത: പ്രശസ്ത ബംഗാളി നടി പായല്‍ ചക്രവര്‍ത്തിയെ ഹോട്ടല്‍ മുറിയിൽ മരിച്ച നിലയില്‍ കണ്ടെത്തി. ബംഗാളി സിനിമകളിലെ നിറ സാന്നിധ്യമായിരുന്ന പായല്‍ ചില സീരിയലുകളിലും വേഷമിട്ടിട്ടുണ്ട്. സിലിഗുരിയിലെ ഹോട്ടല്‍ മുറിയിലാണ് പായലിനെ മരിച്ച നിലയില്‍ കണ്ടെത്തിയത്.

നാളുകള്‍ക്ക് മുമ്പ് വിവാഹ മോചിതയായ നടി ആത്മഹത്യചെയ്തതാകാമെന്ന നിഗമനത്തിലാണ് പോലീസ്. വിശദമായ അന്വേഷണം നടക്കുകയാണെന്നും ആത്മഹത്യയാണെന്നാണ് പ്രാഥമിക നിഗമനമെന്ന് പോലീസ് വ്യക്തമാക്കി. കഴിഞ്ഞ ദിവസം ഗാങ്‌ടോക്കിലേക്ക് പോകുന്നതിനായി സിലിഗുരിയിലെ ഹോട്ടലില്‍ മുറിയെടുത്തതാണ് പായല്‍.

രാത്രി ഹോട്ടലില്‍ തങ്ങിയ നടി രാവിലെ ഏറെനേരമായിട്ടും പുറത്തുവരാത്തതോടെ ജീവനക്കാര്‍ക്ക് സംശയം തോന്നി. വാതിലില്‍ ഏറെ നേരം മുട്ടി വിളിച്ചിട്ടും തുറക്കാത്തതിനാല്‍ പോലീസില്‍ അറിയിക്കുകയായിരുന്നു. പൊലീസ് എത്തിയപ്പോള്‍ മുറി അകത്ത് നിന്ന് പൂട്ടിയ നിലയിലായിരുന്നു. മുറി തുറന്ന് പരിശോധിച്ചപ്പോഴാണ് നടിയെ മരിച്ച നിലയില്‍ കണ്ടെത്താനിടയായത്.