മാൻവേട്ട; സല്‍മാന്‍ ഖാന്‍റെ ജാമ്യാപേക്ഷ ഇന്ന് പരിഗണിക്കും

ജോധ്പൂർ: കൃഷ്ണമൃഗത്തെ വേട്ടയാടിയ കേസില്‍ സല്‍മാന്‍ ഖാന്‍റെ ജാമ്യാപേക്ഷ ഇന്ന് ജോധ്പൂര്‍ സെഷന്‍സ് കോടതി പരിഗണിക്കും. 5 വര്‍ഷം തടവുശിക്ഷ നല്‍കിയ വിചാരണക്കോടതി വിധി റദ്ദാക്കണമെന്നും അപ്പലീല്‍ ആവശ്യപ്പെട്ടിട്ടുണ്ട്.

ഇന്നലെയാണ് സൽമാനെ ജോധ്പൂര്‍ സെന്‍ട്രല്‍ ജയിലില്‍ എത്തിച്ചത്. രണ്ടാം വാര്‍ഡില്‍ 106ാം നമ്പര്‍ തടവുകാരനാണ് സല്‍മാന്‍ ഇപ്പോൾ. ജയിലിൽ പ്രത്യേക പരിഗണനയൊന്നും സൽമാന് വേണ്ടി ഒരുക്കിയിട്ടില്ല. കിടക്കാന്‍ കട്ടിലോ മെത്തയോ നൽകിയിട്ടില്ല. ഇന്ന് ജയില്‍ യൂണിഫോം നല്‍കും.

അതേസമയം ജയിലില്‍ സല്‍മാന് ജീവന് ഭീഷണിയുണ്ടെന്ന് ജാമ്യാപേക്ഷയില്‍ വ്യക്തമാക്കിയിരുന്നു. എന്നാല്‍ ജയിലില്‍ സുരക്ഷാ ഭീഷണി ഇല്ലെന്നും മൂന്ന് പൊലീസുകാരെ കാവലിന് ഏർപ്പെടുത്തിയിട്ടുണ്ടെന്നും ജയില്‍ ഡിഐജി അറിയിച്ചു. അഭിഭാഷകര്‍ക്കും കുടുംബാംഗങ്ങള്‍ക്കും മാത്രമാണ് സല്‍മാനെ കാണാന്‍ അനുമതിയുള്ളത്.

ജാമ്യം ലഭിക്കുകയാണെങ്കിൽ അപ്പീല്‍ നല്‍കാനാണ് സല്‍മാനെതിരെ കേസ് നല്‍കിയ ബിഷ്‌ണോയ് സമുദായത്തിന്‍റെ തീരുമാനം. മാൻ വേട്ടയിൽ കൂട്ട് പ്രതികളായ സെയ്ഫ് അലി ഖാനും തബുവും എന്നിവർ അടക്കമുള്ള അഞ്ച് പ്രതികളെ വെറുതെ വിട്ടതിനെതിരെയും ബിഷ്‌ണോയി വിഭാഗം അപ്പീല്‍ നല്‍കും.

1998 ഒക്ടോബര്‍ രണ്ടിന് ജോധ്പുരിലെ കങ്കണി ഗ്രാമത്തില്‍ രണ്ട് കൃഷ്ണമൃഗങ്ങളെ വേട്ടയാടി കൊന്നുവെന്നാണ് സൽമാന് എതിരെയുള്ള കേസ്. കഴിഞ്ഞ സെപ്റ്റംബര്‍ 13-നാണ് ഈ കേസില്‍ വാദം ആരംഭിച്ചത്. 20 വര്‍ഷങ്ങള്‍ക്കുശേഷമാണ് കേസില്‍ വിധി പുറപ്പെടുവിക്കുന്നത്.