ആളനക്കമില്ലാതെ റാം റഹിമിൻ്റെ ദേര..!

സിര്‍സ: ഹരിയാനയിലെ ദേരയിൽ ആളനക്കമില്ലാതാ‍യിട്ട് നാളുകളായി. ആൾ തിരക്കും കച്ചവടവും കൊണ്ട് നിറഞ്ഞ ആശ്രമ പരിസരം ഇപ്പോൾ കനത്ത നിശബ്ദതയിലാണ്. ഗുര്‍മീത് റാംറഹീമെന്ന ആള്‍ ദൈവം പടത്തുയ‍ർത്തിയ ദേര സച്ചാ ആത്മീയ സാമ്രാജ്യം ശ്മശാന മൂകതയിലാണ്. സ്കൂളുകള്‍, വ്യാപാര സ്ഥാപനങ്ങള്‍, ഫാക്ടറികള്‍, സിനിമ തീയേറ്റര്‍, പെട്രോള്‍ പമ്പുകൾ ഒന്നും തന്നെ പ്രവ‍ർത്തിക്കുന്നില്ല. വ്യാപാര സ്ഥാപനങ്ങള്‍ ഏതാണ്ടെല്ലാം തന്നെ പൂട്ടിക്കഴിഞ്ഞു.

നോക്കിനടത്താറുള്ള ദേര അധ്യക്ഷ വിപാസന ഇന്‍സാൻ കുറച്ച്‌ ആഴ്ചകളായി അസുഖം മൂലം എത്താറില്ല. റാംറഹീമിന്‍റെ മകന്‍ ജസ്മീത് ഇന്‍സാന് ദേരയുടെ ഉത്തരവാദിത്തങ്ങള്‍ ഏറ്റെടുക്കാന്‍ താതപര്യമില്ലെന്ന് നേരത്തെ അറിയിച്ചിരുന്നു. 10000 പേരെങ്കിലും ഉണ്ടായിരുന്ന ദേരയില്‍ 800ല്‍ താഴെ ആളുകള്‍ മാത്രമാണെന്നാണ് ഹരിയാന പോലീസ് പറയുന്നത്. ഇൗ ആത്മീയ കേന്ദ്രം പൂര്‍ണമായും തകര്‍ന്നിട്ടില്ല. കഴിഞ്ഞയാഴ്ച നടന്ന ദേരസ്ഥാപകന്‍ ഷാ മസ്താനാ ബലോചിസ്താനിയുടെ ജന്മദിനാഘോഷത്തില്‍ 4000 പേരാണ് പങ്കെടുത്തത്.