നാം അമ്മ പത്രം, അമ്മ ടിവി: പുതുതന്ത്രങ്ങളുമായി എഐഡിഎംകെ

ചെന്നൈ: നിയമസഭ തിരഞ്ഞെടുപ്പ് മുന്നിൽകണ്ട് അമ്മ വികാരം ആളിക്കത്തിക്കാനുറച്ച് എഐഡിഎംകെ. ജയലളിതയുടെ സ്മരണാര്‍ത്ഥം നാം അമ്മ എന്ന മുഖപത്രവും അമ്മ ടി വി എന്ന ടെലിവിഷൻ ചാനലും തുടങ്ങാൻ പാര്‍ട്ടി തീരുമാനിച്ചു. സര്‍ക്കാരിന്‍റെ ജനോപകരാരപ്രദമായ പല പദ്ധതികളും ജനങ്ങളിലേയ്ക്കെത്തിക്കുകയും പാര്‍ട്ടി എതിരാളികള്‍ക്ക് മറുപടി കൊടുക്കുകയുമാണ് പുതിയ പദ്ധതിയുടെ ഉദ്ദേശ്യമെന്ന് പാര്‍ട്ടി വൃത്തങ്ങള്‍ സൂചിപ്പിക്കുന്നു.

പാര്‍ട്ടി സ്ഥാപകനായ എംജിആറിന്‍റെ ജന്മദിനമായ ജനുവരി 17നോ ജയലളിതയുടെ ജന്മദിനമായ ഫെബ്രുവരി 24നോ നാം അമ്മ പത്രം പുറത്തിറക്കാനാണ് പാര്‍ട്ടി പദ്ധതിയിടുന്നത്. ടെലിവിഷൻ ചാനൽ തുടങ്ങാനുള്ള പ്രവര്‍ത്തനങ്ങള്‍ പുരോഗമിച്ച് വരികയാണ്. ജയ ടിവിയും നമദു എംജിആര്‍ പത്രവും ഏറ്റെടുക്കാനുള്ള നിയമപ്രശ്നമാണ് പുതിയ സ്ഥാപനങ്ങള്‍ തുടങ്ങാനുള്ള തീരുമാനത്തിനു പിന്നിൽ.

നമദു എംജിആര്‍ പത്രത്തിന്‍റെ മുൻ എഡിറ്ററായിരുന്ന മരുത് അളകുരാജാണ് നാം അമ്മ ദിനപത്രത്തിന്‍റെ എഡിറ്ററും. കഴിഞ്ഞ ആഗസ്റ്റ് 28ന് ചേര്‍ന്ന് പാര്‍ട്ടി യോഗത്തിലാണ് ഇതുസംബന്ധിച്ച തീരുമാനമുണ്ടായത്.