മൻമോഹൻ സിങിൻ്റെ നില തൃപ്തികരം; ചികിത്സയോടു പ്രതികരിക്കുന്നുണ്ടെന്ന് ആശുപത്രി വൃത്തങ്ങൾ

ന്യൂഡൽഹി: മുൻ പ്രധാനമന്ത്രിയും സാമ്പത്തിക ശാസ്ത്രജ്ഞനുമായ ഡോ. മൻമോഹൻസിങിന്‍റെ നില തൃപ്തികരമെന്ന് ഡോക്ടര്‍മാര്‍. അദ്ദേഹം നിരീക്ഷണത്തിലാണെന്നും മരുന്നുകളോടു പ്രതികരിക്കുന്നുണ്ടന്നും ഡൽഹി ഓള്‍ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കല്‍ സയൻസസിലെ ഡോക്ടര്‍മാര്‍ അറിയിച്ചു. ദേഹാസ്വാസ്ഥ്യത്തെ തുടര്‍ന്ന് ഞായറാഴ്ചയാണ് 87കാരനായ മൻമോഹൻ സിങിനെ ആശുപത്രിയില്‍ പ്രവേശിപ്പിച്ചത്.

Also Read: COVID-19 Live Page: ലോക്ക് ഡൗണ്‍; പ്രധാനമന്ത്രിയും മുഖ്യമന്ത്രിമാരും തമ്മില്‍ നിര്‍ണായക ചര്‍ച്ച ഇന്ന്

അദ്ദേഹത്തിനു പുതിയൊരു മരുന്ന് നല്‍കിയതിനോട് റിയാക്ഷൻ ഉണ്ടായതിനാലാണ് ആശുപത്രിയില്‍ പ്രവേശിപ്പിച്ചതെന്നും പനിയുണ്ടാകാനുള്ള കാരണങ്ങള്‍ കണ്ടെത്താനായി പരിശോധനകള്‍ നടത്തി വരികയാണെന്നും ആശുപത്രി വൃത്തങ്ങള്‍ അറിയിച്ചു. നിലവില്‍ അദ്ദേഹം നിരീക്ഷണത്തിലാണെന്നും ആശുപത്രി വൃത്തങ്ങള്‍ വ്യക്തമാക്കി. ആശുപത്രിയിലെ ഹൃദ്രോഗവിഭാഗത്തിലെ ഒരു സംഘം ഡോക്ടര്‍മാരാണ് അദ്ദേഹത്തെ ചികിത്സിക്കുന്നതെന്നും അദ്ദേഹത്തിന്‍റെ ആരോഗ്യനില തൃപ്തികരമാണെന്നും അടുത്ത വൃത്തങ്ങള്‍ ടൈംസ് ഓഫ് ഇന്ത്യയോടു പറഞ്ഞു. നെഞ്ചുവേദനയെ തുടർന്ന് ഞായറാഴ്ച രാത്രി 8.40ഓടു കൂടിയായിരുന്നു മൻമോഹൻ സിങിനെ ആശുപത്രിയിൽ പ്രവേശിപ്പിച്ചത്.

Also Read: മുൻ പ്രധാനമന്ത്രി മൻമോഹൻ സിങ്ങിനെ ആശുപത്രിയിൽ പ്രവേശിപ്പിച്ചു

കോൺഗ്രസ് നേതാവും മുൻ പ്രധാനമന്ത്രിയുമായ മൻമോഹൻ സിങ് നിലവില്‍ രാജസ്ഥാനില്‍ നിന്നുള്ള രാജ്യസഭാ എംപിയാണ്. 2004 മുതല്‍ 2014 വരെയുള്ള കാലയളവിലാണ് മൻമോഹൻസിങ് പ്രധാനമന്ത്രി സ്ഥാനത്ത് തുടര്‍ന്നത്. മുൻ റിസര്‍വ് ബാങ്ക് ഗവര്‍ണറായ മൻമോഹൻ സിങ് മുഖ്യ സാമ്പത്തിക ഉപദേഷ്‌ടാവ്, അന്താരാഷ്ട്ര നാണ്യനിധി അംഗം തുടങ്ങിയ പദവികളും വഹിച്ചിട്ടുണ്ട്. 1991മുതൽ പി വി നരസിംഹ റാവു മന്ത്രിസഭയില്‍ ധനമന്ത്രിയായിരുന്നു അദ്ദേഹം.2009ല്‍ അദ്ദേഹത്തെ ഡൽഹി എയിംസ് ആശുപത്രിയില്‍ വെച്ച് ബൈപ്പാസ് ശസ്ത്രക്രിയയ്ക്ക് വിധേയനാക്കിയിരുന്നു. മൻമോഹൻ സിങ് എത്രയും വേഗം സുഖം പ്രാപിക്കട്ടെയെന്ന് മുതിര്‍ന്ന രാഷ്ട്രീയ നേതാക്കള്‍ ആശംസിച്ചിട്ടുണ്ട്.