മുന്നറിയിപ്പില്ലാതെ സമരം ചെയ്തവരെ പിരിച്ചുവിട്ട് എയർ ഇന്ത്യ; പണി പോയത് 30 പേർക്ക്

ന്യൂഡൽഹി: മുന്നറിയിപ്പില്ലാതെ സമരം ചെയ്ത് യാത്രക്കാരെ പ്രതിസന്ധിയിലാക്കിയ ജീവനക്കാർക്കെതിരെ നടപടിയുമായി എയർ ഇന്ത്യ എക്സ്പ്രസ്. അവധിയെടുത്ത് പ്രതിഷേധിച്ച 30 ജീവനക്കാരെ കമ്പനി പിരിച്ചുവിട്ടു. അപ്രതീക്ഷിത അവധിയെടുത്തത് ബോധപൂർവമാണെന്നാണ് കാബിൻ ക്രൂ അംഗത്തിന് നൽകിയ കത്തിൽ എയർ ഇന്ത്യ മാനേജ്മെന്‍റ് പറയുന്നത്. അവധിയെടുത്ത് പ്രതിഷേധിച്ച കൂടുതൽ ജീവനക്കാർക്കെതിരെ നടപടിയുണ്ടാകുമെന്നാണ് പുറത്തുവരുന്ന റിപ്പോർട്ടുകൾ. ഒരു ന്യായവുമില്ലാതെയാണ് ഉദ്യോഗസ്ഥർ മുൻകൂട്ടി തീരുമാനിച്ച് ജോലിയിൽ നിന്നും വിട്ട് നിന്നത്. ഇതിനെത്തുടർന്ന് 90 ഓളം വിമാന സർവീസുകൾ റദ്ദ് ചെയ്യേണ്ടി വന്നു. കമ്പനിയുടെ ഏറ്റവും വിലപ്പെട്ട യാത്രക്കാർക്ക് വലിയ അസൗകര്യം സൃഷ്ടിക്കുകയും കമ്പനിയ്ക്ക് നാണക്കേടുണ്ടാക്കുകയും ചെയ്തു. പൊതുതാത്പര്യത്തിനെതിരായിരുന്നു ഇവരുടെ പ്രവൃത്തിയെന്നും കമ്പനി പറയുന്നു.

കൊല്ലത്ത് കാത്തിരിപ്പ് തുടർന്ന് മൂന്നാം വന്ദേ ഭാരത് റേക്ക്; സ്പെഷ്യൽ ട്രെയിനായി സർവീസ് ഉണ്ടാകുമോ?
ധനനഷ്ടം ഉൾപ്പെടെയുള്ള പ്രശ്നങ്ങൾ ചൂണ്ടിക്കാട്ടിയാണ് സമരം തുടങ്ങി രണ്ടാംദിവസം ജീവനക്കാർക്കെതിരെ എയർ ഇന്ത്യ നടപടിയെടുത്തിരിക്കുന്നത്. സുഖമില്ലെന്ന് ചൂണ്ടിക്കാട്ടിയുള്ള കൂട്ടയവധി വിമാന സർവീസുകൾ റദ്ദാക്കുന്നതിനുള്ള ആസൂത്രിത നീക്കമാണെന്നാണ് മനസിലാക്കുന്നതെന്നും ഇത് എയർ ഇന്ത്യ എക്‌സ്പ്രസ് ലിമിറ്റഡ് എംപ്ലോയീസ് സർവീസ് റൂളുകൾ ലംഘിക്കുന്ന നടപടിയാണെന്നും കത്തിലുണ്ടെന്നാണ് റിപ്പോർട്ടുകൾ.

എയർ ഇന്ത്യ എക്സ്‌പ്രസിന്‍റെ ഇരുനൂറിലധികം കാബിൻ ജീവനക്കാർ കൂട്ടയവധിയെടുത്തോടെയാണ് ചൊവ്വാഴ്ച രാത്രിമുതൽ വിമാന സർവീസുകൾ മുന്നറിയിപ്പില്ലാതെ റദ്ദാക്കേണ്ടി വന്നത്. വിഷയത്തിൽ ഡിജിസിഎ എയർ ഇന്ത്യ എക്സ്‌പ്രസിനോട് വിശദീകരണം തേടുകയും ചെയ്തിരുന്നു.
എയർ ഇന്ത്യ സമരം: വിമാനങ്ങൾ റദ്ദാക്കുന്നത് തുടരുന്നു, ഇന്ന് രാവിലെ റദ്ദാക്കിയത് 4 സർവീസുകൾ
അതിനിടെ എയർ ഇന്ത്യ ജീവനക്കാരുമായുള്ള തർക്കത്തിൽ മാനേജ്മെന്‍റിനെതിരെ ലേബർ കമ്മിഷണർ രൂക്ഷമായി രംഗത്തുവന്നെന്നും റിപ്പോർട്ടുകളുണ്ട്. തൊഴിൽ നിയമത്തിന്‍റെ ലംഘനം നടന്നെന്ന് ഡൽഹി റീജിയണൽ ലേബർ കമ്മിഷണറുടെ വിമർശിച്ചതായാണ് റിപ്പോർട്ട്. ഇന്ന് 75 വിമാന സർവീസുകളാണ് എയർ ഇന്ത്യ റദ്ദാക്കിയത്.