യാത്രക്കാരൻ കോക്ക്പിറ്റിൽ കയറാൻ ശ്രമിച്ചു; എയര്‍ ഇന്ത്യ വിമാനം തിരിച്ചിറക്കി

ന്യൂഡൽഹി: ബലം പ്രയോഗിച്ച് യാത്രക്കാരൻ വിമാനത്തിന്‍റെ കോക്ക്പിറ്റിലേയ്ക്ക് പ്രവേശിക്കാൻ ശ്രമിച്ചതിനെത്തുടര്‍ന്ന് എയര്‍ ഇന്ത്യ വിമാനം ഇറ്റലിയിലെ മിലനിൽ തിരിച്ചിറക്കി. ഓഗസ്റ്റ് രണ്ടിനാണ് ഡൽഹിയിലേയ്ക്ക് പുറപ്പെട്ട വിമാനം മിലനിൽ തിരിച്ചിറക്കിയത്. യാത്രക്കാരനെ പോലീസിന് കൈമാറിയ ശേഷം വിമാനം ഡൽഹിയ്ക്ക് പുറപ്പെട്ടു.

ഇന്ത്യക്കാരനായ ഗുര്‍പ്രീത് സിങ് എന്നയാളാണ് ബലം പ്രയോഗിച്ച് കോക്ക്പിറ്റിനുള്ളിലേയ്ക്ക് കടക്കാൻ ശ്രമിച്ചത്. വിമാനത്താവളത്തിലെത്തിയ ഉടനെ ഇയാളെ പോലീസ് കസ്റ്റഡിയിലെടുത്തു. വിമാനം ടേക്ക് ഓഫ് ചെയ്ത് ഒരു മണിക്കൂറോളം പറന്ന ശേഷമാണ് തിരിച്ചിറക്കിയത്.

വിമാനത്തിൽ 250 യാത്രക്കാരുണ്ടായിരുന്നു. വിശദമായ പരിശോധനകള്‍ക്കുശേഷം സുരക്ഷാപ്രശ്നങ്ങളില്ലെന്ന് ഉറപ്പു വരുത്തി വീണ്ടും പുറപ്പെടുമ്പോള്‍ വിമാനം രണ്ടരമണിക്കൂറിലധികം വൈകിയിരുന്നു.