യാതൊരു അടിത്തറയുമില്ലാതെ കോൺഗ്രസ്, ജനപിന്തുണ നഷ്ടപ്പെടുന്നു, സ്ഥാനാർത്ഥികൾ നോട്ടയ്ക്കും പിന്നിൽ, സഖ്യം അവസാനിപ്പിക്കാൻ ഘടകകക്ഷികൾ

2021 ലെ അസം നിയമസഭാ തെരഞ്ഞെടുപ്പിൽ കോൺഗ്രസും എഐയുഡിഎഫും തെരഞ്ഞെടുപ്പിന് മുമ്പ് സഖ്യത്തിലേർപ്പെട്ടിരുന്നു. തെരഞ്ഞെടുപ്പിലെ പരാജയത്തിന് പിന്നാലെ കോൺഗ്രസ് സഖ്യം അവസാനിപ്പിക്കുകയായിരുന്നു. എന്നാൽ‌ ഗുവാഹത്തി മുനിസിപ്പൽ തെരഞ്ഞെടുപ്പിൽ‌ കോൺഗ്രസിന് ലഭിച്ച പരാജയം ഭീകരമായിരുന്നു. 38 കോൺഗ്രസ് സ്ഥാനാർത്ഥികൾക്ക് കെട്ടിവച്ച കാശ് പോലും ലഭിച്ചിരുന്നില്ല. ഒരു സ്ഥാനാർത്ഥിക്ക് ജനങ്ങൾ കൊടുത്ത വോട്ടുകളുടെ എണ്ണം നോട്ടയേക്കാൾ താഴെയായിരുന്നു.

കോൺഗ്രസ് പാർട്ടിക്ക് പൊതുജനങ്ങളുമായി ഒരു ബന്ധവുമില്ലെന്ന് തെളിയിക്കുന്നതാണ് ഇതൊക്കെയെന്നാണ് എ ഐ യു ഡി എഫ് നേതാവ് കരിം ഉദ്ദിൻ ബർഭുയ അഭിപ്രായപ്പെടുന്നത്. കർബി ആംഗ്ലോങ് സ്വയംഭരണ കൗൺസിൽ തിരഞ്ഞെടുപ്പിലും കോൺഗ്രസ് പാർട്ടി സംപൂജ്യരായിരുന്നു. രാജ്യത്തെ ഏറ്റവും പഴക്കമുള്ള പാർട്ടിക്ക് ഇന്ന് യാതൊരു വിധ അടിത്തറയുമില്ല. ഈ സാഹചര്യത്തിൽ കോൺഗ്രസുമായി സഖ്യമുണ്ടാക്കുന്നത് വിഡ്ഢിത്തമാണ്. അത്തരമൊരു വിഢിത്തം ഒരു കാരണവശാലും ചെയ്യില്ലെന്നാണ് എ ഐ യു ഡി എഫ് നേതാവ് വ്യക്തമാക്കുന്നത്.

അസമിലെ കോൺഗ്രസ് പൂജ്യത്തിലും സന്തോഷവനാമാരാണ്. 2024ലെ ലോക്സഭ തിരഞ്ഞെടുപ്പിലും ഇതു തന്നെ സംഭവിക്കാം. കോൺഗ്രസുമായുള്ള സഖ്യം അവസാനിപ്പിക്കുമ്പോൾ ഏത് കക്ഷിലേക്ക് പോകണമെന്നത് ജനങ്ങൾ തിരുമാനിക്കും. സംസ്ഥാനത്തെ എല്ലാ ജാതിയിലും സമുദായത്തിലും പെട്ട ആളുകളിൽ നിന്ന് നിർദേശങ്ങൾ ലഭിക്കുന്നുണ്ട് ഇത് അനുസരിച്ചായിരിക്കും ഇനിയുള്ള നീക്കം. പൊതുജനങ്ങൾക്ക് ഒപ്പം പ്രവർത്തിച്ച് അവരുടെ അഭിപ്രായം സ്വീകരിച്ച് തീരുമാനങ്ങളിൽ എത്തുമെന്നും അദ്ദേഹം അഭിപ്രായപ്പെട്ടു.

നേരത്തെ അസമിൽ മൂന്ന് ലോക്‌സഭാ സീറ്റുകൾ ആയിരുന്നു എ ഐ യു ഡി എഫ് നേടിയിരുന്നത്. ഇത്തവണ അത് അഞ്ച് സീറ്റുകൾ ആയി വർധിപ്പിക്കാൻ സാധിക്കുമെന്ന ആത്മവിശ്വാസവും ബർഭുയ പ്രകടിപ്പിച്ചു. അതേസമയം എ ഐ യു ഡി എഫ് ബിജെപിയുടെ ബി ടീമായി മാറിയെന്ന ആരോപണവുമായി കോൺഗ്രസ് രംഗത്ത് എത്തിയിട്ടുണ്ട്. എ ഐ യു ഡി എഫ് എംഎൽഎമാർക്ക് ബിജെപിക്കൊപ്പം നിൽക്കാമെന്ന അഭിപ്രായം ബദ്‌റുദ്ദീൻ അജ്മൽ പറഞ്ഞതായി അസം കോൺഗ്രസ് അധ്യക്ഷൻ ഭൂപൻ കുമാർ ബോറ അഭിപ്രായ ആരോപിക്കുന്നു.